Lawng Hkang Ginra Na Malawng Mare Kaw Laknak Kaba Wa Hkrat Ai Majaw Nta Masha Marai (3) Asak Si Sum Ai Lam

Pajau Media

8 December 2025

Hpakant Ginra Malawng mare kaw December 7 ya shana daw hta laknak kaba wa hkrat kapaw ai majaw nta langai kaw na marai 3 asak si sum mat ai lam Hpakant ginra masha tsun ai kaw na chye lu ai.

Myen hpyen dap gaw Laknak kaba, Drone bawm ni gap shadam ai majaw Lawng Hkang ginra kata Malawng mare na dum nta langai kaw wa hkrat kapaw ai majaw nta masha marai 3 asak si sum nna shata hku sha naw re ai Ma Chyangai langai gaw asak lawt ai re lam chye lu ai.

“ Dum nta Masha marai 5 nga ai, marai langai gaw nta kaw gan n nga taw ai, nta kaw nga taw ai ni kaw na ma chyangai sha kam kaja ai majaw asak lawt ai re” nga nna Hpakant ginra masha tsun ai.

Dum nta masha marai 5 nga ai kaw na Kasha kaba dik wa gaw shi lauban na nta de wa yup ai aten nta kaw bawm wa hkrat kapaw ai re lam, dai wa hte Ma Chyangai sha asak lawt ai re lam chye lu ai.

Lai wa sai de December 5 ya shani hta mung Hpakant Muklum Yu Ma mare, Shwe Chyauk Sawng Store seng makau kaw sinat gap ningma hte La langai asak si sum taw ai rai nna Hpakant Muklum ginra hta Myen hpyen dap Laknak kaba gap shadam ai majaw jahkring hkring Mung masha hkala, asak si sum ai lam nga ai re hpe chye lu ai.

Shiga – Zau