Lung Seng Dut Mari Galaw Nga Ai Aten Myen Hpyen Dap Kawn Sinat Hkan Gap Ai Lam

Pajau Media

October 23. 2025

Jinghpaw Mung Hpakant Ginra October 22 ya shana hkying 7 aten daram hta Mawsi Zar Lung Seng dut mari shara hte Lawng Hkang Lung Seng dut mari shara ni hta Myen hpyen dap gaw mawdaw hte du shang wa nna Sinat hkan gap ai lam chye lu ai.

" N lung dut mari ai masha grai law nga ai aten Myen hpyen dap gaw dai hku nan shang wa nna Sinat hte hkrup mara gap ai shaloi marawn ai ni gaw marawn, hprawng ai ni gaw hprawng re " nga nna ginra masha langai tsun ai.

Sinat gap manghkang a majaw Ginra masha ni grai hkrit tsang nga ma ai lam, Myen hpyen dap a uphkang masa a n tsa matut nna gara hku byin wa na ngu ai hpe Mung masha ni grai myit tsang nga ma ai re.

N dai laman Hpakant Ginra hta gasat gala majan n nga ai raitim myen hpyen dap gaw Nbungli htim gasat ai lam ni matut manoi galaw nga ai re hpe mung chye lu ai.

Shiga - Hpring