Lung Sha Yang Mung Mare Masha ni Lu lang nga ai Hka kaw Ja htu hkyen nga ai Ja htu Lauban ni hpe Mung Mare Masha ni Ninghkap

Pajau Media Channel

Putao, Lung Sha Yang Mung mare masha ni madung Lu Lang ai hka shatai nna akyu jashawn jai lang nga ai Lung Sha Hka kaw Jak kaba ni hte Ja htu hkyen nga ai Ja htu Lauban ni hpe Lung sha Yang Mung mare masha ni Numdaw lahkawng lang ngu na Ninghkap ai re lam chye lu ai.

Lung Sha Hka kaw Jak kaba hte ja htu hkyen nga ai ja htu lauban ni gaw Mandalay kaw na U Myint Aye hte Daw Ar Cha Se( Lung Sha Yang) yan re hte dai yan hpe Lung sha Hka kaw ja htu ai lam tsep kawp n galaw na matu lai wa sai September shata hta mung kalang Mung mare masha ni ninghkap ai majaw jahkring kau ai re, raitim numdaw kalang bai Jak kaba ni hte htu shalau na matu hkyen wa ai majaw December 9 ya shani hta kalang bai ninghkap jahkring kau lu ai re hpe mung chye lu ai.

Lung Sha Hka gaw dai ginra masha ni Lu lang ai hka mung re sha n-ga Hkau na E ka Hkying lam a matu madung jai lang hka mung re, dai Hka hpe ya na zawn Ja htu shalau kau yang Hka lam hten za nna jai lang n mai mat na re majaw dai hka kaw Jak kaji ni hte dang di dang dep ai hku htu sha nga ai ginra masha ni yawng hpe mung jahkring da ai re .Lung Sha Hka hta Jak kaba hte ja htu sha ai lam tsep kawp n galaw na matu U Myint Aye hte Daw Ar Cha Se (Lung Sha Yang) yan hpe Mare Salang woi awn ai hte Mung masha marai (41) shang lawm rai nna tsun sadi jaw ai lam lang hte lang galaw ai raitim n hkap la, Jak kaba hte htu sha na matu galaw wa ai re.

Ja htu bungli madu ni tsun ai hta KIA Dap Dung (7) kaw na lit nga ai Salang langai hte myit hkrum da ai lam nga ai, Lam galaw ngut ai hpang Ja htu magam bungli galaw sha ahkang jaw na lam myit hkrum da ai majaw galaw wa ai re nga nna tsun wa ai re. Ndai lam hte seng nna ginra mung mare masha ni gaw tsep kawp myit n hkrum ai re hte matut nna shanang wa ai rai yang ja ja ahkyak la sa wa na re lam, Daw Ar Cha Se hpe Ga sadi ta masat htu shangun sai re hpe mung chye lu ai.

Putao, Lung Sha Yang Ninghtawn kata hta Mare kahtawng (14) lawm ai rai nna Lung Sha Yang mare kaw Mung masha marai(8,000) daram shanu nga ai mare kahtawng kaba langai mi re hpe mung chye lu ai.Putao ginra hta Covid ana zinli byin ai hpang kaw nna Ja htu sha ai lam Mali hka mayan hte dai ginra kata Hka shi, Hka nu ni yawng hta htu sha ai lam lani hte lani law jat nga dingyang re lam Mali Hku shiga jaw la ai kaw na chye lu ai.

Shiga- Mali Hku