Lung Tung Pawng Hpawm Myen Hpyen Dap Shagyit Makau Kaw Mung Masha Langai Bawm kabye Kapaw Si Ai Lam

Pajau Media

September 30, 2025

In Daw Gyi ginra kaw nga ai Lung Tung pawng hpawm shagyit makau kaw Asak 41 ning re ai Salang Pyae Hpyo Awng gaw September 25 ya shani Bawm kabye kapaw la nna asak si sum ai lam ni nawn ai nta masha ni tsun ai kaw na chye lu ai.

Asak si sum mat ai La gaw Kung Mana mare kaw dinghku de nna Ningrum Ningtau Jan hpe Hopin de wa sa nna bai n htang wa ai lam Lung Tung shagyit makau kaw Sam amyu sha hte seng ai lam hpe madun ai shara shawng maga de Cycle gawt na matu ganawng magaw taw ai ten bawm kabye la nna Asak si sum ai re hpe chye lu ai.

Asak si sum ai wa gaw Mai Nawng mare kaw Tun Ja rai seng hpaw da ai wa rai nna asak 6 ning re ai ma Num kasha hte asak 3 ning re ai kasha lu ai re lam chye lu ai. Lung Tung shagyit kaw mawdaw cycle lai sa ahkang pat da ai shata masum re sai lam chye lu ai.

Shagyit aw ra hkran hkan nga ai Mare kahtawng kaw nna Lung Tung mare de Jawng sa Jawng wa galaw ai Ma ni a matu Jahpawt Hkying 8 kaw na 8 jan kaw kalang, shani ka-ang hkying 12 kaw na hkying 1 lapran kalang, shana daw Hkying 3 kaw na 4 jan du hkra kalang hkawm sa ahkang jaw da ai re.

KIA uphkang da ai He Ho mare lam braw de myen hpyen dap kawn laknak kaba hte shana shagu gap bun ai majaw laknak kaba wa hkrat ai shara hkan na Mung masha ni gaw Loi Mun mare de koi yen wa sai re hpe chye lu ai.

In daw Gyi ginra de Nam Mun Bum n tsa kaw nna Nam Mun, Mai Nawng, Ma mung Kai, Lung Tung du hkra myen hpyen dap SNA pawng hpawm hpung ni uphkang da ai re. Nawng a sinpraw maga Shwe Let Pan, Le Pon lay, Sanun Kawng kaw nna He Pu du hkra myen hpyen dap pawng hpawm hpung ni uphkang da ai re hte Nawng a sinna maga gaw Nam Pade kaw na Chyong Wa du hkra, He Pa kaw na Lung San Ywar Tit hkan gaw KIA kawn uphkang da ai re hpe chye lu ai.

KIA zing madu ai shara ni law wa ai majaw Myen hpyen dap gaw gasat gala n nga tim Nbungli bawm Drone Bawm Jahkrat ai lam matut manoi galaw wa ai sha n-ga Myen hpyen dap shagyit hkan lai wa lai sa Mung masha ni hpe laja lana jep joi ai lam galaw ai re.

Indaw Gyi ginra hta Phone Internet line dawm jahkring da ai re majaw matut mahkai lu na matu grai yak ai re hpe chye lu ai.

Shiga- kachin Pyi Tar