Machang Baw Ginra Mawdaw Hkrun Lam N hpaw Shi Ai Lam

Pajau Media

November 25, 2025

Putao Ginra kata hpyen masa gaw lani hte lani Shaja wa ai masa re hte Htang Ga kaw nna Sinpraw Hkran Ginra hkawm sa lam pat da ai mung shata mi jan wa sai raitim n hpaw shi ai re hpe chye lu ai.

Htang Ga kaw na Ding Hkyet Ginra hkawm sa hkrun lam hpe lai wa sai October 11 ya, dai ginra kata gasat gala byin ai hpang pat kau ai gaw ya aten du hkra re hte dai aten laman Putao de lam amyu myu hku nna gan hkawm sa ai ni ya du hkra mare de n mai wa nna chyat nga ai re .

" Lam n hpaw ai majaw yawng gaw grai yak sai, Hpyen masa mung grau she laja wa na zawn nga, Dinghkyet maga de na Myo de gan sa ai kaw Ma chyu jahka ai Kanu ni, Jawngma ni lawm ai, ya gaw n mai wa mat matut mahkai mung n lu re chyat nga ai" nga nna Ginra masha tsun ai.

Putao Sinpraw hkran Ding Hkyet Ginra de gaw KIA pawng hpawm hpung ni shamu shamawt nga ai hte Htang Ga hkran maga de Myen hpyen dap shara la da ai re hpe chye ai. Ya na zawn Hpyen masa shuk shanut wa ai majaw Ginra masha ni gaw Nam de pru hkawm tam lu tam sha grai yak wa ai re lam chye lu ai.

Myen Hpyen dap P.T.Ts Pawng Hpawm hpung ni gaw Putao Ginra kata Hpyen n-gun jat shamu ai lam matut manoi galaw nga ai majaw Putao ginra kata gasat gala majan laja wa mai ai lam ginra masha ni tsun maram da ai re .

Shiga- Pyilan U