Machyang Baw Ginra Kata Alang Ga Mare Kaw Nna Myen Hpyen Dap Post Langai Htingnut Mat Ai Lam

Pajau Media Channel

25th March, 2024

Putao Machyang Baw ginwang kata Alang Ga mare kaw dap Jung nga ai Myen hpyen dap npu P.T.Ts pawng hpawng post langai gaw March 24 ya shani htingnut dawm mat ai lam Alang Ga ginra masha langai tsun ai kaw na chye lu ai.

“Gasat gala majan gaw n nga ai, raitim March shata praw kaw Machyang Baw ginra masha ni March 25 ya shani hpang jahtum tawn nna shim ai de htawt sit na matu KIA/KPDF pawng hpawng hpung ni kawn sadi jaw ai lam ni nga ai re. Dai majaw Machyang Baw Myo kaw daju ai Hk.L.Y (137) hpe makawp na matu n -gun gahkyin ai masa hte hting nut mat ai rai na re. Hk.LY (137) kaw na nan Hpyen mawdaw lahkawng hte htaw la mat ai re" lam ginra masha ni tsun da ai re.

Htingnut dawm mat ai Dap gaw Machyang Baw hte Nawng Mun sa lam lapran kaw shara jahkrat nga ai re hte March praw daram kaw nna Myen hpyen dap HK.L.Y (137) gaw Dap shara makawp hku nna hpyen dap makau mayan hkan bawm hkam da ai majaw mung masha ni a dumsu, nga uloi ni kapaw si ai lam ni nga ai re hpe mung chye lu ai.

“Shawoi gaw Alang Ga kaw dap jung ai Post gaw hpyen n-gun shi jan daram nga ai re, shara shagu de htu shadut majan hpang wa ai kaw nna Dap shara kaw masha nga ai pyi n mu mat sai” nga nna ginra masha matut tsun ai re.

Ya na masa hta Machyang Baw ginra masha ni mung gasat gala majan laja wa na hpe grai myit tsang nga ma ai re hte rawt malan hpung maga na gaw Machyang Baw ginra masha ni hpe lawan koi yen na matu tsun wa ai lam laika shadu ai lam ni nga ai raitim ginra masha ni gaw hprawng yen shara n mu nga ai hte ya na masa hku nga yang gasat gala majan gaw grai sawng wa na masa nga ai nga nna ginra masha ni mung tsun maram da ai hpe Mali Hku tang madun da ai.

Shiga - Mali Hku