Machyang Baw Nawng Hkai Ginra Jak Li Daru Pat Kau Sai Lam

Pajau Media Channel

15th March, 2024

Putao Ginra, Nawng Hkai mare Mali Hka Jak Li Daru hpe myen hpyen dap kawn pat kau na matu matsun wa ai majaw March shata bat 2 kaw nna aten n masat pat kau sai majaw Mali Hka ginra mayan hta sun galaw sha masha ni yak hkak nga ma ai re hpe chye lu ai.

Ya pat kau ai jak li daru gaw Putao, Machyang Baw ginra Mali Hka hka nam de yu wa ai hka lam a matu madung hkawm sa nga ai hkrun lam langai re, Mali Hka hka nam mayan de nga ai mare kahtawng ni, ja maw hte hkai sun galaw sha ai mung masha ni gaw n dai jak li lam hku sha madung galaw sha ai re majaw ya na zawn aten n masat pat kau ya ai majaw ginra masha ni yak hkak ai lam tsun ai.

Machyang Baw ginra masha langai tsun ai hta “Nawng Hkai jak li daru pat da ai gaw bat mi daram rai wa sai. Tsep kawp n mai hkawm mat sai. Dai majaw ja maw ginra na masha law malawng gaw nam lam hku sha lam hkawm sa mat sai. Ya aten Mali Hka mayan sun galaw sha ai ni gaw chinghkrang dan na aten mung re, ya gaw jak li hkrun lam pat kau sai re majaw grai yak mat sai”.

Ya na zawn aten n masat pat kau ai lam gaw Mali Hka lawu maga de nga ai KIA,PDF ni malu masha htaw shalai ai ngu ai masa a majaw hkum pat kau ai re nga nna mung tsun ai. “Jak li pat kau ai madung gaw Mali Hka hka nam de nga ai KIA,PDF ni malu masha ni n mai shalai hkra hkrun lam gan pat kau ya ai masa sha re. Galoi ten du hkra rai na ngu chyawm n lu tsun shi ai”.

Mali Hka, hka nam daw ginra de N Hka Ga mare kaw lai wa sai ten hta gaw Myen hpyen dap hte P.T.Ts pawng hpawng hpung ni dap jung shara jahkrat nga ai raitim 2023 Dec 18 ya shani KIA/PDF pawng hpawng hpyen hpung ni kawn htim gasat zing madu la lu ai hpang KIA pawng hpawng hpung ni hpyen shamu shamawt lam grai galaw ai nga shiga ni mawng nga ai majaw ya na zawn myen hpyen dap kawn jak li daru pat kau ya ai re lam chye lu ai.

Shiga - Mali Hku