Mai Ja Yang Muklum De Myen Hpyen Dap Lak Nak Kaba Gap Bun Ai Majaw Mung Shawa Ni Koi Yen

Paiau Media Channel

27th March, 2024

Manmaw-Loi je lam mayan de March 27 ya jahpawt hkying (6:00) AM daram kaw nna Myen hpyen dap shara (4) daram de KIA pawng hpawng hpung ni htu shadut htim gasat nga ai re hte Yaw Yung Bum Myen hpyen dap kawn Mai Ja Yang muklum grup yin de lak nak kaba gap shadam ai majaw mung masha ni gan hprawng yen hkawm nga ra ai re hpe mung chye lu ai.

“Jahpawt hkying 7:00 AM daram kaw na lak nak kaba nsen ni matut manoi na ai. Jahpawt shat hpe mana de kaw na shadu shajin da ai re. Sha na hkyen yang nbungli nsen ngoi wa ai majaw kalang ta kaduk de koi yen ra mat ai. Jahpawt shat pyi nlu sha shi ai” nga nna ginra masha langai tsun ai.

Nmawk hte Loije lapran na Yaw Yung Bum hte Myen hpyen dap shara ni hpe htim gasat ai hta Myen hpyen dap maga na nbungli jai lang laja lana htim gasat nga ai sha n-ga Mai Ja Yang muklum makau mayan de mung shani ka-ang daram du hkra lak nak kaba shi jan lang ram gap bang nga ai re lam mung chye lu ai.

Myen hpyen dap maga kawn Loi Je, Mai Ja Yang makau mayan de lak nak gap bun ai majaw mung masha ni gaw kadai mung kadai shim lum dum ai shara de hprawng koi yen nga ma ai re lam chye lu ai. KIA Pawng hpawng hpyen hpung ni gaw lai wa sai March (7) ya kaw nna Myitkyina-Manmaw mawdaw lam mayan na Myen hpyen dap shara ni hpe gasat zing madu la nga dingyang re hte March (26) ya shani hta mung Kung Law Myotit, Salawng Kawng mayan dap jung nga ai Myen hpyen dap shara ni hpe zing madu la lu sai lam chye lu ai.

Ya aten KIA pawng hpawng hpung ni kawn Yaw Yung Bum mayan hta htu shadut htim gasat nga dingyang re sha n-ga Sumpra Bum ginra hta mung gasat gala majan matut manoi shang nga dingyang re lam mung chye lu ai.