Mai Nawng Hte Ma Mung Kai Ginra Na Tat Sum Kau Ai Shara Ni Hpe KIA Pawng Hpawm Hpung Ni Bai Zing Madu Ai Lam

Pajau Media

August 18, 2025

Jinghpaw Mung Indaw Gyi ginra kata na Mai Nawng hte Ma Mung Kai kaw nna tat sum kau ai shara ni hpe KIA pawng hpawm hpung ni bai zing madu ai lam hpyen shi sawk masha ni kaw na chye lu ai.

Myen hpyen dap hte SNA Sam hkyeng P.T.Ts pawng hpawm hpung ni Mai Nawng, Ma Mung Kai kaw nga ai Myen hpyen dap Posts ni hpe August 16 ya shani zing madu ai lam chye lu ai.

Dai dap shara hpe August 16 ya jahpawt daw hkying 5: 40 aten daram hta Masat (9) Dap ba kata na pawng hpawm hpung ni kawn htu shadut htim gasat ai majaw zing madu la lu ai re lam chye lu ai.

Myen hpyen dap gaw gasat gala majan laman nbungli hte laja lana gap gasat nga ai lapran Dap shara lahkawng hpe zing madu la lu ai re . Mai Nawng hte Ma Mung Kai mare lahkawng hpe KIA pawng hpawm hpung ni lai wa sai July 15 ya shani tat sum kau da ai re hte Dap shara n kau hpe August 16 ya shani bai lu la ai re hpe mung chye lu ai.

Dai ginra kata dai ni aten du hkra gasat gala majan naw shaja hkat nga dingyang re lam chye lu ai. Dai sha n-ga Myen hpen dap hpung ni gaw Hpakant Nam Ya hkawm sa hkrun lam de mung Hpyen n-gun 500 grup yin htu shadut da ai rai nna ya aten hpyen masa grai shaja hkat nga ai zawn Manmaw ginra de mung gasat gala majan laja nga ai re lam chye lu ai.

Shiga- Hpring