Maina Hpyen Yen Camp Hte Makau Ding Gri Hka Makau Kaw Myen Hpyen Dap Shara La Dap Jung Hkyen Ai Lam

Pajau Media

June 24.2025

Myen hpyen dap hte pawng hpawm P.T.Ts hpung ni gaw mung masha ni hte ni gahtep ai hkan shara la wa ai re hte Mai Na hpyen yen camp hte nau n tsan Ding Gri Hka kaw makau kaw Dap shara Jung hkyen ai masa hpe mu ai lam Maina ginra masha langai tsun ai kaw na chye lu ai.

Ding Gri hka kaw P.T.Ts hpung shara la nga ai gaw May shata htum maga kaw nna shara la nga nna lai wa lai sa ni hpe hkap jahkring jep, mawdaw gumhpraw hta sha ai lam ni galaw ai re. N dai laman gaw Ding Gri hka kawng kaw hkyen jasan ai lam ni galaw nga ai nga nna Maina ginra masha tsun ai re.

“ Ya P.T.Ts ni shara la ai shara kaw gaw Anhte ni dingyang na maza sa kabai ai shara re, lai wa lai sa ni hpe jep ai, mawdaw ni hpe gumhpraw hta sha ai rai nga, ya gaw dai kaw dap nan jung hkyen sam ai, nam hkyen jasan ai taw nga ai, anhte Maina Camp hte gaw grai ni gahtep taw sai, Maina lam ntsa hkan shinggan bu hpun palawng hpun na sinat gaw hpye rai hkap nga ai, hpyen yen camp pyi shim lam tsang ra sai” nga nna tsun ai.

Myen hpyen dap pawng hpawm hpung ni gaw mung masha hte ni gahtep ai hkan shara la wa ai re majaw majan laja wa yang mung masha ni hkra machyi lam law wa mai ai,ya na zawn mung masha hte ni htep ai hkan shara la ai gaw mung masha hpe ninggang shatai ai lam mung re nga nna ginra masha ni tsun nga ma ai re.

 Gasat gala majan sawng wa yang Maina hpyen yen camp gaw Myit tsang ra ai masa re majaw lawan ladan yen yang kaja ai nga nna mung masa hpyen masa maram masam ai salang ni tsun nga ma ai re. Ya aten camp masha law malawng buga de wa nga ai ni law sai raitim n kau gaw buga de n mai wa shi ai majaw maja let nga taw ai masa re lam chye lu ai.

Waimaw ginra kata n dai laman gasat gala majan laja ai lam gaw n nga ai raitim laknak kaba, drone hte gap bun ai lam ni gaw dingyang galaw nga ai re hpe mung chye lu ai. Myen hpyen dap gaw tat sum kau sai Chihpwi, Pangwa, Kanpaiti ni hpe bai lu hkra Waimaw Wa Shawng lam hku hpyen n-gun htu shadut shamu shmawt nga ai re lam hpyen masa maram masam nga ai ni tsun da ai hpe mung chye lu ai.

Shiga- Pyilan U