Makawp Maga Tsi N Nga Ai Nipah Virus Kap Shabra Na Tsang Ra Ai Majaw Maigan Pru Hkawm Masha Ni Sadi Maja Na Matu N Dau Ai Lam

Pajau Media

29th January 2026

Ya aten Myen Mungdan kaw Nipah Virus ana kap bra ai lam n nga shi ai raitim dai ana gaw Namsi Nam saw sha ai Pazip (သစ်သီးစားလင်းနို့) ni hkan nna kap bra wa ai re majaw grai sadi ra na hte ya aten dai ana kap bra ai lam law nga ai India, West Bengal State ni de hkrun lam ai lam n galaw na matu Myen Mung Hkamja Dap hkringmang rung kawn sadi jaw n dau da ai re hpe chye lu ai.

Myen Mungdan masha ni hku nna n ahkyak ai sha India , West Bengal State ni de hkrun lam hkawm ai lam n galaw na lam, hkrun lam hkawm ai kaw nna bai n htang wa ai aten hkum hkrang hta ntsen na zawn re ai ana kumla ni - baw Makret ai, machyi nga n pyaw ai lam, jahkru ai lam, n sa sa chyat ai zawn re ai, yup nga nga na zawn re hkam sha ai rai yang seng ang ai hkamja rung ni de lawan ladan shiga shana ra ai lam tsun da ai re.

Kap bra ana byin nga ai mungdan ni hkan hkawm ang ai rai yang tinang mungdan de n htang wa ai n htoi 14 ya laman ana lahta kaw tang madun da ai ana kumla ni madun yang seng ang ai hkam ja rung de shana nna aten dep tsi tsi hkam la ai lam galaw ra na lam ja ja tsun da ai re.

Nipah Virus gaw Pazip ni kaw nna kap bra wa ai re lam sawk sagawn da ma ai hte dut sat kaw nna mung kap bra mai ai lam, masha shada gaw jit, sai, salat zawn re ai hkum hkrang kaw nna pru ai ntsin ni hpe hkra gasawt hkrup ai kaw nna mung kap bra wa mai ai re majaw machyi masha gawn lajang ai lam ni hta mung , ta laraw, n gup magap ni atsawm jai lang nna gawn lajang hkat ra ai lam tsun da ai re.

Malu masha, nam si nam saw ni ahpye alam re ai ni hpe sha ai zawn re ai ni, malu masha sha ai hta mung san seng hkra galaw nna she mai sha nga ai lam hkam ja lam magam gun ni tsun sadi jaw da ai re.

Nipah Virus hpe Mungkan Hkamja Dap (WHO) kawn mung grai sadi ra ai ana hpan langai hku masat da ai re hte dut sat ni hkan nna kap bra wa ai re majaw ya aten du hkra gaw makawp maga tsi n nga shi ai lam, htuk manu ai makawp maga tsi hpe sha jai lang nna ninghkap taw nga ai re hpe mung chye lu ai.

Shiga – Pyilan U