Myitkyina Muklum Kata Myihprap Wan Jaw Ai Aten N law Ai Majaw Ginra Masha Ni Yak Hkak Hkrum Nga Ai Lam

Pajau Media

January 29, 2026

Jinghpaw Mung Myitkyina muklum kaba hta myi hprap wan jaw ai aten n law ai majaw ginra masha ni yak hkak nga ai lam tsun ai re.

Ya na zawn myi hprap wan sa ai aten hta wan nsa ai aten grau law ai lam byin ai gaw 2026 shaning n nan kaw nna re lam Myitkyina ginra masha langai tsun ai kaw na chye lu ai.

“Dai ning kaw nna grau sawng sai, shani tup rai yang hkying hkum 2, 3 sha sa ai, sa ai mung shana hkying 11 hpang daw kaw nna jahpawt hkying 5 n du shi ai aten bai si sai, shat shadu sha aten nga yang bat mi kaw kalang ram pyi nsa ai” nga nna tsun ai re.

Myi hprap wan jaw ai aten n law ai majaw solar wan n lu shakap ai dai ni tam dai ni sha mung masha ni a matu grai yak hkak ai re lam, myi hprap wan a malai hpun, wan n-ga ni mung manu grai rawt nga ai majaw grau yak hkak ai re lam chye lu ai.

Dai sha n-ga shani shagu jawng sa, bungli sa ai ni a matu mung wan nsa ai majaw battery cycle wan bang la na matu mung grai yak hkak wa ai re lam chye lu ai. January 19 ya shani kaw nna Myitkyina muklum myihprap wan jaw ai masa gaw A,B,C,D daw hte daw masat nna shi aten hte shi hkying hkum 8 jaw ai masa hku nna galaw nga ai re hpe mung chye lu ai.

Shiga- Zau