Mali Hka Kaw Mahkrai Galaw Na Matu Zai Bru Shaw Ai Gabaw Hte Ja Htu Sha Nga

Pajau Media

May 8. 2025

Jinghpaw mung Myitkyina kaw Mali Hka Mahkrai langai bai gaw gap na matu gaw gap masing kata Mali Hka kaw nna Zai Bru ni ladu lai shaw ai hta ja bai htu sha bang wa ai majaw Mali Hka ka-ang daram du hkra mawdaw mai hkawm ai madang byin nga sai lam ginra masha ni tsun ai.

“Mahkrai galaw na matu Zai Bru htu ai kaw na ja ni pru wa ai majaw Mahkrai n pu de ja htu ai lam grau law wa ai re,” nga nna Myitkyina ginra masha langai tsun ai re.

Mahkrai nnan gaw gap masing hta Zai Bru ni ladu lai shaw nga ai sha n-ga ja mung grai htu sha wa ai gaw hka ka-ang daram du wa sai raitim matut manoi htu nga dingyang re hpe mung chye lu ai.

“Dai shara kaw ja galaw ai masha ni grai law ai, hpyen yen ni grai law ai. Hpyen masa a majaw koi yen hkawm ai ni bungli n lu ai ni law malawng galaw nga ma ai. Ngut na Zai Bru shaw nna Set Mu Zone hte Man Hkring lamu ga man ai shara kaw tawn da nna Mawdaw langai mi kaw kade ngu ai hku bai dut sha ai re,” nga nna tsun ai.

Ya na zawn ja htu, zai bru ladu lai shaw ai majaw Mali Hka kaw zun lawng zawn tai wa sai re. Jak kaba ni hte ja htu ai ni nga ai zawn lata hte sha dang di dang dep ai hku htu sha ai mung law law nga ai lam chye lu ai.

Shiga- Hpring