Mali Hka Mayan Nga Ai Mare Kahtawng Hkan Myi Hprap Wan Aten Man Man N lu Ai Majaw Yak Hkak Ai Lam

Pajau Media

October 15, 2025

Jinghpaw Mung Mali hka mayan nga ai N-gan, Nawng Hkying, Labang kahtawng hkan shanu nga ai hpyen yen Mung masha ni hte ginra masha ni gaw Myi hprap wan atsawm n lu ai majaw lam magup yak hkak nga ai lam chye lu ai.

Myi hprap wan gaw shana aten jahkring mi daram sha lu ai raitim jahkring hkring bai si ai lam, shani ka-ang aten hta mung Wan nsa ai aten grau law ai majaw shani shagu na myi hprap wan jai lang nna galaw ra ai bungli ni, jawngma ni Laika galaw ai lam ni hta yak hkak ai lam chye lu ai.

Myi hprap wan aten n man ai majaw n kau gaw Wan jak jai lang ai rai nna, ja gumhpraw yak hkak ai Mung masha ni gaw Wan shadaw, Solar, hpun Wan ni hpe madung jai lang let nga taw ra ai lam chye lu ai.

N-gan mare kaw Hpyen koi yen htinggaw 244 nga ai rai nna marai 1,144 shanu nga ai hte jawng lung nga ai Jawngma marai 150 grup yin nga ai lam chye lu ai. Ya aten Jinghpaw Mung Myi hprap Wan mayak a majaw Mung masha yawng gaw aten man man wan n lu ai mayak ni hkrum sha nga ma ai re hpe chye lu ai.

Maga mi de mung NGO hte WFP garum hpung ni kawn mung Mung masa mayak manghkang a majaw garum ai lam gau ngwi ngwi dawm jahkring wa ai re lam chye lu ai.

Shiga – Htu Seng