Mali Nmai Madim Masing Hte Seng Nna Shawa Ningmu Jahpaw Ai Lam Myitkyina Muklum Hta Galaw Ai Lam

Pajau Media

April 4, 2026

Myitkyina muklun kaw nga ai Shwe Nyaungpin lawk Miwa Htunghking Jawng hta Mali Nmai hka madim masing hte seng nna ningmu jahpaw mungshawa zuphpawng galaw ai lam chye lu ai.

Ndai zuphpawng hpe April shata praw 3 ya shani galaw ai rai nna, Jinghpaw mungdaw hkringmang daju Hkyet Hting Nan hte ginra masha nkau lata saw shaga la hkrum ai ni sa du shanglawm ai lam chye lu ai.

Dai zuphpawng hta, Hkringmang Daju Hkyet Hting Nan gaw, Mali Nmai hka wan jak hpe madi shadaw mai ai, tsang n ra ai lam, wan n-gun shani shagu ra taw ai sha n-ga ndai zawn bawngban tsun galaw ai gaw grai pyi hpang hkrat taw sai lam tsun dan wa ai hpe chye lu ai.

Daru magam zing ngut ai hpang myen hpyen hpung ni bai hpang wa ai mali hka masing hpe jahkring kau na matu Kachin State Human Rights Defenders Network kawn April shata praw 1 ya shani ndau laika shapraw wa sai.

Mali Nmai Madim masing hte seng nna mung shawa ni a ra sharawng ai lam hpe tup hkrak hkungga na matu, ndai masing hpe ninghkap ai masha ni hpe ahkyak la na ngu jahkrit shama ai lam ni hpe kalang ta jahkring kau na matu mung tsun shadut da ai re.

Shiga - Htu Seng