Mali Zup Lam Dingyang Myen Hpyen Dap Shara La Jep Joi Ai Lam Galaw Nga

Pajau Media

September 15, 2025

Myitkyina Mali Zup lam P.L.N lahta daw hkrun lam hta Myen hpyen dap pawng hpawm hpung ni hkawm sa hkawm wa Mawdaw Cycle ni hpe jep joi ai majaw Mung masha hkrit tsang nga ma ai re lam chye lu ai.

Myen hpyen dap pawng hpawm hpung ni gaw shani shagu jep joi ai hku nre sha kalang marang kajawng kaja hkap jep ai lam, Myitkyina kaw nna lahta daw lung ai mawdaw, cycle ni hpe madung jep ai re lam ginra masha ni tsun ai re.

Lai wa sai September 10 ya shani hta mung Myen hpyen dap pawng hpawm hpung ni marai (10) grup yin gaw Jahpawt daw hkying 7 kaw na hkying 9 du hkra P.L.N mare lahta tsang jawng makau lam braw ni hkan Mung masha ni hpe hkap jahkring jep joi ai lam chye lu ai.

Dai sha n-ga Mali Zup lam ntsa Lamung zup gate hta mung lahta daw lung na mawdaw ni hpe hkap jahkring ai lam, gumhpraw hta ai lam ni dingyang galaw nga ai re lam, hkrun lam hkawm mawdaw ni hpe hkap jahkring nna Bilat buk ni htaw shangun ai lam ni galaw nga ai lam hkrun lam hkawm masha langai tsun ai re.

“ Anhte yu wa ai aten dai gate kaw jawn lawm ai masha ni yawng hpe yu shangun ai, Mawdaw sara ni hpe mung yu shangun ai, ngut na Bilat buk ni hpe htaw shangun ai grai na hkra pru mat ai, shana daw de she pru wa ai, grai na hkra la kau ra ai” nga nna tsun ai re.

Myen hpyen dap gaw January shata ka-ang daram kaw nna Shwe Zet Lam braw kaw nna P.L.N lam dingyang, ခြောက်မိုင်ကုန်း HPung gyi jawng makau, P.L.N balik dap shawng, Lahta tsang jawng makau Ying Hkaw lam braw makau dai shara hkan shara la nna kalang marang jep joi ai lam ni galaw nga ai lam chye lu ai.

Shiga - Htu Seng