Malizup Madim Masing Hpe Bai Bawngban Jahkrup Ai Lam

Pajau Media

22 January 2026

Jinghpaw Mungdaw Hkringmang Daju Salang Hkyet Hting Nan kawn woi awn nna Malizup Myi Hprap Wan Madim masing hte seng nna ginra lit nga komiti ni hte bawngban jahkrup hpawng hpe January 20 ya shani galaw sai lam chye lu ai.

Hkring Mang Daju Salang Hkyet Hting Nan kaw nna Malizup madim masing hte seng nna madi shadaw lu na lam, pawng hpawm galaw sa wa lu na matu Jinghpaw Mung ginra masha Komiti hpaw wa ai masa lam ni, magam bungli lit ni hte komiti kaw ra ai lam ni hpe jahkum shatsup lu na masing ni hpe tsun sanglang ai lam chye lu ai.

Ginra madu Komiti malawm ni hku nna komiti a magam bungli lit ni a ntsa matut nna galaw sa wa na shawng lam masing ni hte seng nna mung san jtai jahkrup ai hta Jinghpaw Mung hkringmang daju gaw shawng lam masing a matu jahkrup bawng ban ai lam chye lu ai.

Myitkyina ginra masha ni gaw lai wa sai January 10 ya shani ang ai Jinghpaw Mungdaw masat n htoi hta n-gun 60 jan shang lawm nna Mali hka hkyin gau shara mi kaw Malizup madim masing hpe ninghkap ai lamang galaw lai wa sai re.

 Jinghpaw Mungdaw masat n htoi shani galaw ai lamang a yaw shada lam gaw Jinghpaw Mung asuya hpung ni hku nna Malizup madim masing hpe chyawm ninghkap na matu madung hpyi shawn ai re hpe mung chye lu ai.

Dai majaw Myen Mundan mung shawa yawng ninghkap ai majaw shaning 10 jan ning jahkring da ai Malizup madim masing bai galaw na matu myen hpyen dap awn galaw wa ai ntsa yawng chyawm ninghkap na hpe mung masha ni ra sharawng nga ma ai re hpe mung chye lu ai.

Shiga – Htu Seng