Man Hkring Lawk Kaw Lagut Langai Lu Rim Ai Lam

Pajau Media

March 11, 2026

Myitkyina muklum Man Hkring lawk kaw mani March praw 10 ya shani shana daw hkying 7 laman Man Hkring hpyen yen camp kata cycle shang lagu ai lagut la langai hpe lu rim ai lam ginra masha tsun ai kawn chye lu ai.

Dai lagut gaw shana daw hkying 7 aten hpyen yen camp kata hpyen yen ni akyu hpyi taw aten cycle lagu na matu cycle ganawng taw ten hpyen yen amyu shayi langai mu dat nna hprawng mat ai majaw hpyen yen masha ni hte ginra masha ni hkan rim ai kaw lu rim la ai hpe chye lu ai.

“Hpyen yen ni yawng pawng na akyu hpyi taw ten dai lagut cycle lagu na matu galaw taw ai, dai hpe dinggai langai nsen na nna sa yu yang lagut gaw cycle baw gayin na ganawng taw nga, dinggai jan marawn dat na hprawng mat ai kaw hpyen yen ni mung yawng hkan shachyut ai’’ nga ginra masha langai mi tsun ai.

Dai lagut hpe seng ang ai ni hte lawk salang ni san jep yang Waimaw muklum Jam Ga mare makau Da Jang mare na Zahkung Naw re lam hpe tsun dan nna dai ntsun dan shi laman Hpakant na re nna Myitkyina kaw nga taw lam amyu myu masu tsun lai wa ai.

Ya ten cycle lagu hkrum ai cycle madu kawn tara shawk shawn ai lam matut bai n galaw ai majaw seng ang ai kaw na sha hpang e bai n galaw na matu sha tsun nna bai dat kau ya lam chye lu ai.

Myitkyina muklum hta nta kata na mawdaw, cycle ni hte manu dan ai arai ni sha n-ga wan pu, wan sumri, hkyep din ni du hkra lagu hkrum taw ai re.

Shiga - Htu Seng