Tigyaing Muklum Kata Shani Shagu Nbungli Bawm Gasat, Takaung Muklum Myen Hpyen Dap Ni Bai Zing Lu Ai Lam.

Pajau Media

March 11, 2026

Sagaing ginra Tigyaing muklum kata nbungli hte gasat ai ni law law galaw wa nna mani March praw 10 ya shani ka-ang hkying 1 laman Tada-U kawn lung wa ai fighter jet 1 hte Zikung mare hta bawm 2 lang wa gap ai majaw mung masha marai 8 ram asak si sum nna marai 18 ram hkala ai lam hpe chye lu ai.

Dai hte maren March praw 9 ya shani hkying 2 minute 14 aten hta mung Tada-U kawn lung wa ai jet fighter 1 hte Aung Tar Kung mare makau bawm 2 lang wa gap bun ai sha n-ga hkying 4 jan laman hta mung Tada-U kawn lung wa ai jet fighter 2 hte Satsar mare hte Nita mare makau bawm 4 lang ram wa gat ai hta Nita mare kawn mung masha 2 hte Satsar mare kawn mung masha marai 3 hkra hkala ai lam nga wa ai.

Dai hta n-ga March praw 8 ya shani ka-ang hkying 12 minute 25 aten Aletaw mare na tsi rung makau Homalin kawn lung wa ai jet fighter hte bawm 2 lang wa gat ai majaw mung masha marai 2 hkra hkala wa ai.

Tigyaing muklum hpe lai wa sai February shata 28 ya shani kaw na muklum zing majan kalang bai hpang wa ai hpang myen hpyen dap ni kawn nbungli gasat ai lam ni matut na galaw wa ai majaw phone line hte internet line ni pat kau hkrum ai zawn hpyen dap ni a nbungli hpyen hpe sadi na matu mung masha shada da sadi jaw nga ai lam chye lu ai.

KIA/PDF pawng hpawng hpung kawn madu up hkang ginra hku nna up hkang lai wa ai laning nga wa ai Sagaing ginra Takaung muklum hpe mung March 10 ya shani hkying 1 aten hta tat kau nna hpyen dap gaw Takaung muklum zing ai hte Mandalay ginra ting hpe bai up hkawng da ai lam chye lu ai.

Shiga-Kachin Pyi Tar