Man Win Gyi Mare Kaw Yup Tung Aten Myen Hpyen Dap Nbungli Bawm Wa Jahkrat Ai Lam

Pajau Media

August 15, 2025

Jinghpaw Mung Man Je Muklum Man Win Gyi mare kaw August 14 ya yup tung aten Myen hpyen dap nbungli bawm wa jahkrat ai lam ginra masha ni kaw na chye lu ai.

“ Mana hkying 12 aten daram kaw nna 12 jan daram du hkra nbungli pyen gawai ai hpang bawm 4 lang wa jahkrat kau da ai re, lahkawng lang gaw mare hte kade n tsan ai kaw wa hkrat ai, langai gaw Kawng Hkan mare de wa hkrat ai, langai gaw kaga shara Nga bang da ai Hka Lawng hta wa hkrat ai re” nga nna tsun ai re.

Myen hpyen dap Jet nbungli hte bawm 4 lang wa jahkrat ai hta masha si hkala hkrum ai lam hte seng nna ya du hkra hpa n na lu shi ai re lam chye lu ai. Dai sha n-ga ginra masha ni gaw dai shana jang ni nawn ai hte shimlum dum ai shara ni hkan koi yen hkawm mat ai re lam chye lu ai.

Gasat gala majan n nga ai shara hkan yup tung aten nbungli bawm wa jahkrat bun ai majaw ginra masha ni grai myit tsang nga ma ai re lam hte Man Win Gyi mare gaw lai wa sai shaning January shata hta mung KIA pawng hpawm hpung ni htim gasat zing madu da ai KIO uphkang ginra re hpe mung chye lu ai.

Shiga - Zau Mai