Mandalay-Myitkyina Hkrun Lam Zin Mare Makau De Myen Hpyen Dap N-Gun Htu Shadut Lung Wa Ai Majaw Hkrun Lam Pat Da Ai Lam

Pajau Media Channel

5th April,2024

Sagaing ginra Kan Balu, Myitkyina-Mandalay mawdaw hkrun lam Zin mare makau mayan de Myen hpyen n-gun jat bang nga dingyang re hte gasat gala majan byin ai majaw mawdaw hkrun lam gan pat tawn da ai re lam chye lu ai.

“Dai hkrun lam kaw dingyang ngu na daram gasat gala byin ai. Shanhte n lai shangun yang tsep kawp nan n mail ai. Tsang ra ai majaw n lai shangun ai hpe n kau gaw nau n chye na ma ai. Atik anang lai ai ni lawm ai. Grai nan yak ai, gasat gala masa hpe yu nna she hkawm sa ra taw ai.”

Pat tawn da ai hkrun lam makau mayan kaw lai wa sai March shata laman hta Kachin Mintar hkawm sa mawdaw langai hkam bawm rin kapaw la ai majaw mung masha marai lahkawng asak si sum nna marai masum hkala sawng ai lam byin lai wa sai re.

Myen hpyen dap maga kawn mung Zin mare makau mayan de hpyen n-gun ladu lai jat bang nna htu shadut nga ai majaw mung shawa makawp maga hpung PDF ni hte gasat gala majan jahkring hkring byin ai hte hkawm sa hkrun lam ni hpe pat da ra ai madang du wa ai re. Hkawm sa hkrun lam pat da ai gaw manga ya ram rai wa sai lam mawdaw la ni tsun ai kaw na chye lu ai.

April 5 ya jahpawt hkying (8:00) AM aten daram hta mung Myen hpyen dap Pyusawhti pawng hpawng dap ni gaw Kan Balu Pe Kung mare kaw nna mung masha dum nta (18) daram hpe wan nat jahten ai re lam hte Kawlin Kan Balu ginra hta mung internet line ni yawng pat tawn da ai re nga nna ginra masha ni tsun ai kaw na chye lu ai.

Shiga - Kachin Pyi Tar