Manmaw Bawng Masha Marai (700) Daram Hpe Nta Masha Ni Myit Tsang Nga Ma Ai

Pajau Media

June 19, 2025

KIA ni zing madu la na matu gasat gala laja nga ai Jinghpaw Mung Manmaw ginra na bawng masha ni gaw malu masha yak hkak jam jau hkrum nga ai hta n-gawng hte langu hpe sha shat malai shani shagu sha nga nna, nta masha ni kawn garum hpyi wa ai majaw myit ru myit tsang nga ai lam mying n tsun mayu ai marai langai tsun ai.

“Htawng masha ni gaw n-gu nnga sai re majaw n-gawng hte langu hpe sha sha ra taw ai da, nkau grumhpraw lu ai ni gaw myen hpyen la ni na madu jan ni bye mi hta lap (30000) hte sa dut ai ten hta mari sha ma ai. Dai majaw shan hte n-gu mari sha na matu grumhpraw sen lahkawng ram garum na matu Phone hte matut mahkai wa ai, shanhte hpe n-gawng hte langu sha jaw sha taw ai ngu tsun ai” ngu mying n tsun mayu ai marai langai tsun ai.

Ya aten Manmaw htawng hta htawng masha marai 700 daram nga nna Myen hpyen dap kaw na bawng masha ni hpe majan kata laknak lang shang gap(hpyen la tai na matu) tsun ai raitim, bawng masha ni yawng ningdang da ai hte bawng masha ni law malawng gaw jinghpaw amyu sha ni rai nna nta masha ni hte matut mahkai lam n nga ai lam chye lu ai.

"Shanhte hpe hpyen la galaw na matu tsun ai. Raitim shanhte yawng myit hkrum nna anhte gaw hpyen n galaw ai ngu ningdang da ai da. Dai majaw shanhte hpe shat ni njaw sha ai mung rai na re .Bai nna shanhte a malu masha htum mat ai majaw hpyen dap kaw na njaw sha ai mung rai na re. Gara hku mi rai rai shinggan kaw nna hpa mung n lu galaw ai majaw yawn hkyen ai hte myit tsang nga ai." lahta e tsun lai wa sai wa matut tsun ai.

Manmaw ginra hta majan byin ai shata 6 jan na wa sai rai nna majan shata na wa ai hte maren bawng kata malu masha n law ai lam grau sawng wa ai rai na re lam hpe nta masha ni tsun ai.

“ Phone hte matut mahkai galaw wa ai majaw grai kabu ai. Raitim shanhte gaw shat n lu sha ai ngu tsun ai shaloi myit npyaw ai grai matsan dum ai gara hku mung nlu sa garum ai majaw myit tsang ai” ngu tsun ai.

Manmaw bawng gaw Nawnghko lawk na ya ten gasat gala nga ai SKA (21) hpyen dap ginra kata kaw rai nna, KIA pawng hpawng hpung ni hte shani shagu gasat gala majan sawng taw ai majaw mung nta masha ni tsang taw nga ma ai.

Dai hta n-ga bawng masha ni hte lu hkrum na matu bawng shang laika ahkang n lu nna matut mahkai lam n lu galaw ai aten mung grai na sai zawn, majan laja lana byin nga ai hte shat atsawm nlu sha ai na ai majaw asak si sum na hpe tsang taw ai hpe nta masha ni tsun ai.

Shiga - Zau Mai