Manmaw De Lung Wa Ai Sanghpaw Hpung Ni Hpe Htim Gasat Kau Lu Ai Lam

Pajau Media

July 30, 2025

Hti Chyai muklum kaw shana yup hkring nna Manmaw maga de man yawng lung wa ai Sanghpaw hpung ni hpe KIA pawng hpawm hpung ni kawn Shwe Gu lahta daw hta hkap gap gasat ai majaw July 29 ya shani sanghpaw hten za mat ai Vedio sumla ni ganghkau shiga ni hta mu lu ai re hpe chye lu ai.

KIA pawng hpawm hpung ni kawn Myen hpyen dap sanghpaw hpung ni hpe July 27 hte 29 ya hta hkap gap yang shana daw hta gaw Hpyen lak nak arung arai hte lu sha htaw wa ai Mu Ga Magap nna yawng wa ai sanghpaw langai hpe lu gap hkra ai lam hpe shawng lam shi sawk ni tsun ai kaw na chye lu ai.

KIA pawng hpawm hpung ni kawn lam lapran kaw hkap gap ai majaw Shwe Gu kaw nna Manmaw de lung na matu shakut nga ai sanghpaw hpung ni hte hkyin gau hku lagaw lam shimlam la ya nga ai hpung ni mung htingnut mat ai lam chye lu ai.

Dai sanghpaw hpung ni gaw Manmaw ginra gasat gala majan hta Hpyen n-gun jat, lu sha, hpyen lak nak ni garum lu na matu htaw lung wa ai sanghpaw ni rai nna Manmaw ginra n tat hkra Myen hpyen dap gaw shani shagu Drone, Nbungli, Lak Nak kaba hte shani shagu gap bun nga dingyang re hpe mung chye lu ai.

Shiga – Hpring