Manmaw Ginra Gasat Gala Majan Laja Taw Ai Raitim Asuya Magam Gun Ni Hpe Shaga La Na Matu Myen Hpyen Dap Hkyen Nga Ai Lam

Pajau Media

August 8, 2025

Manmaw ginra kata lahkawng maga Hpyen masa gaw dai ni aten du hkra n bungli matut manoi gap nna shaja hkat nga ai masa raitim Myen hpyen dap gaw shanhte n pu na asuya magam gun ni hpe Manmaw ginra de shaga bang na matu galaw nga ai lam Asuya magam gun ni kaw na chye lu ai.

“Manmaw ginra kata na Asuya magam gun ni yawng hpe shaga bang na hkyen ai, num daw hte num daw Helicoptar hte htaw bang na matu gahkyin nga ma ai, n kau gaw kabu gara hkan na hkyen ai n kau gaw myit tsang nga ma ai” nga nna Asuya Hpaji rung magam gun langai tsun ai re.

Ndai masing galaw wa ai gaw du wa na December shata laman Myen mungdan ting madang hku nna ra lata poi galaw na matu hkyen lajang nga ai re. Ya aten Myen mungdan kata Rudi amyu sha ginra ni hta gasat gala majan laja nga ai raitim ra lata poi hpe byin tai hkra galaw na matu hkyen nga ai lam chye lu ai.

Manmaw ginra de August 8 ya shani ya shiga ka nga ai aten du hkra Y 12 n bungli hte bawm wa jahkrat nga dingyang re sha n-ga Manmaw Dakkasu Jawng hte Ts.K.Hk 21 Dap de Hpyen lu sha wa jahkrat nga dingyang re hpe mung chye lu ai.

Lai wa sai August 6 ya shani hta mung Nbungli bawm (19) lang daram wa jahkrat bun ai rai nna KIA pawng hpawm maga kawn Laknak kaba gap bun ai hta Dap 21 kata na Lak nak Dum langai kaw wa hkrat nna kapaw mat ai lam shawng lam shi sawk ni shana wa ai kaw na chye lu ai.

Manmaw ginra kata hta mung Ts.K.Hk (21 ) Dap kaba naw nga ai re majaw dai kata kaw Myen hpyen dap dum nta masha ni grai naw nga ai re hte Asuya magam gun ni hpe gahkyin ra lata poi a matu madung yaw shada ai rai na re nga nna Asuya magam gun hte ni ai Mung masha langai tsun ai re.

“ Kaja nga yang Manmaw ginra gaw Majan Pa she re gaw, shani shana nbungli gap, sinat kaba gap rai grai tsang ra ai kaw mi magam gun ni hpe bai htaw bang nga gaw myit yu hpa, hkan gwi ai ni mung wa si ai hte bung sana nga, ya gaw ra lata poi galaw na re majaw dai kaw nna Sindan Pa gahkyin mayu ai masing sha rai na re, asuya magam gun kade she law ” nga nna tsun ai re.

Grau nna Jinghpaw Mung Waimaw ginra hpe mung Ra lata poi n du shi ai laman lu hkra htim gasat la na matu Myen hpyen dap hkyen lajang nga ai lam shiga ni mawng nga ai re hte ya aten dai ginra mayan de mung shani shagu nbungli, Drone, Laknak kaba ni gap bun nga dingyang re hpe mung chye lu ai.

Shiga- Pyilan U