Manmaw Ginra Hpe Jum Tek Lu Hkra Myen Hpyen Gaw Hpyen N-Gun Kaba Hte Htim Gasat Ai Lam Dingyang Galaw Nga Ai Lam

Pajau Media

September 15.2025

Myen hpyen dap gaw Manmaw ginra yawng hpe jum tek lu hkra hpyen n-gun kaba hte htu shadut htim gasat nga dingyang re majaw Manmaw ginra htim gasat majan gaw aten galu laja wa mai ai lam KIO shiga magam dap lit hkam kawn tsun da ai lam nga ai re.

Manmaw ginra hta hpyen garum sanghpaw hpung ni du shang wa ai August praw kaw nna gasat gala majan laja wa ai gaw dai ni aten du hkra re hte tat sum kau ai shara ni hpe bai lu la hkra nbungli, drone, laknak kaba ni hpe madung jai lang nna n-gun dat gasat wa ai re.

Dai hta September 11 ya laman KIA pawng hpawm hpung ni zing madu da ai Hpri Gang Dap, HK.L.Y 236 dap ni hpe myen hpyen dap bai lu la mat ai lam nga ai re hte myen hpyen dap shiga dap ni hkan gaw Manmaw ginra kata rawt malan hpung ni shamu nga ai ginra yawng hpe zing madu da lu sai lam shiga shamawng ai lam ni nga ai re lam chye lu ai.

Myen hpyen dap n dau da ai hta 2024 December praw 4 kaw nna 2025 September 11 ya laman Manmaw majan hta KIA pawng hpawm hpung ni marai 4,616 asak si sum nna marai 5,000 hkawt nga ai lam myen hpyen dap n dau da ai raitim KIA maga kawn tsun da ai hta hkala, asak si sum ai lam gaw nga ai raitim myen hpyen dap n dau da ai ram n law ai lam tsun da ai re hpe chye lu ai.

Manmaw ginra gasat gala majan hpang wa ai kaw nna Manmaw Ts.K.Hk 21 Dap hta lai nna myen hpyen dap shara law law hpe KIA pawng hpawm hpung ni zing madu da sai raitim myen hpyen dap hpyen garum sanghpaw hpung ni du wa ai hpang kaw nna myen hpyen dap a htim gasat majan gaw lak lai wa ai hte grau laja wa ai majaw gasat gala majan gaw aten galu byin na masa nga ai lam mung tsun da ai re.

Gasat gala majan laja wa ai majaw KIA pawng hpawm hpung ni zing madu da ai Amyawk dap (366) hpe August shata laman myen hpyen dap bai lu la mat ai hte September 11 ya laman zing madu ai dap lahkawng hte rai yang Manmaw Muklum kata na Dap shara (3) hpe myen hpyen dap ni bai lu la mat ai re lam chye lu ai. Manmaw ginra gasat gala majan gaw shani shagu naw laja nga dingyang re lam chye lu ai.

Shiga – Pyilan u