Manmaw Ginra Hta Ga Lam Hku Gasat Gala N Nga Tim Drone, Lak Nak Kaba Gasat Ai Lam Shani Shagu Byin Ai Lam

Pajau Media

July 4, 2025

Jinghpaw mung Manmaw ginra de Myen hpyen dap N-gun kaba hte htim gasat shamu shamawt wa ai gaw shata (7) hpring wa sai re hte n dai laman gasat gala majan shiga ni loi zim nga ai masa raitim Myen hpyen dap gaw hpyen n-gun jahting ai lam galaw ai sha n-ga Drone bawm shani shagu htim gasat nga ai re hpe chye lu ai.

Manmaw ginra de ya aten Lagaw lam htim gasat majan gaw n nga ai raitim Myen hpyen dap gaw Drone shani shagu htim gasat nga ai lam Shawng lam shi sawk tsun ai hta “ Ga Lam hku nna gasat ai majan gaw loi zim ai raitim ya na masa hpe yu yang madang tsaw ai Drone ni hte shani shagu gap ai, grai sadi maja ra ai masa re, Shanhte hku nna htim na matu hpyen n-gun jahting nga ai masa re, Lak nak kaba mung lahkawng maga gap dingyang, ya yang gaw Drone majan hku she rai taw sai” nga nna tsun ai re.

July 2 ya shani hta mung Manmaw ginra de Myen hpyen dap maga kawn Drone bawm (25) lang daram wa jahkrat ai lam, 60 MM ngu maram lu ai lak nak kaba mung shani shagu gap dingyang re lam mung chye lu ai. Manmaw girna kata gasat gala majan byin ai 2024 December (5) kaw nna rai yang shata (7) hpring was ai hta lahkawng maga sum machyi ai lam grai law sai re.

Htim gasat majan laman Myen hpyen dap Nbungli hte laja lana htim gasat nga ai lapran Rawt Malan hpung ni gaw Manmaw N bungli daru hte Myen hpyen dap shara law malawng hpe zing madu da sai re hte Ts.K.Hk 21, Hk.L.Y (47) Dap kaba kata na Dap kasha ni naw nga ai re .

Myen hpyen dap maga na mung Manmaw Muklum tat sum ai lam n nga hkra Hpyen ninggang ja ja shahting da nna shingla gasat nga dingyang re sha n-ga N bungli, drone ni hte hpyen gasat garum, hpyen n-gun jat bang dingyang re majaw rawt malan hpung ni Muklum zing majan shangut na matu aten na taw ai masa re lam chye lu ai.

Myen hpyen dap gaw Manmaw Ginra hte Waimaw ginra hpe kalang ta hpyen n-gun kaba hte htu shadut majan baw na matu grai hkyen shajin nga ai sha n-ga Manmaw ginra de Hka lam hku Sanghpaw hte hpyen n-gun lak nak n-gun ni htaw shalai la lu hkra shakut nga ai lam hpyen masa maram masam nga ai ni tsun da ai re.

Myen hpyen dap gaw ya aten Jinghpaw mung kata na tat sum kau sai shara ni hpe bai lu la hkra hpyen ladat amyu myu hte htim gasat nga ai re. Ya aten Manmaw ginra sha n-ga Hpakant ginra hpe zing madu hkra ginra P.T.Ts ni mung lawm rai nna hpyen n-gun kaba hte htu shadut nga dingyang rai nna hpyen masa grai shaja hkat nga ai lam mung chye lu ai..

Shiga – Pyilan U