Manmaw Ginra Hte Myitkyina Hpakant Lam Mayan De Gasat Gala Majan Laja Nga

Pajau Media

April 25.2025

Jinghpaw mung Myitkyina Hpakant lam mayan hte Manmaw ginra de April 25 ya shani KIA hte Myen hpyen dap lapran gasat gala majan grai laja nga ai lam chye lu ai.

Jinghpaw mung Manmaw ginra de gaw April 25 ya jahpawt daw hkying 4:00 AM daram kaw nna matut manoi gap bun nga dingyang re lam shawng lam shi sawk ni tsun ai re. April 24 ya kaw nna Hpakant Ka Mai ginra de Myen hpyen dap n-gun tsa kaba htu shadut shang wa ai Hpakant Nam Ya hte kade n tsan ai kaw gasat gala byin ai lam hpyen koi yen mung masha ni hpe wa htaw la ai Hpakant ginra masha tsun ai.

“Ya gaw hpyen yen ni gaw yawng yen ra ai maga rai sai. Lung Bra hte Nam Ya dai mayan nga ai ni gaw yawng yen ra sai. Gasat gala byin ai shara gaw Nam Ya hte kade ntsan sai. Mani hkying 3:00 PM daram hta hpyen yen ni hpe wa htaw ai shaloi Nam Ya kaw na pyi sinant kaji kaba n sen grai na taw sai. Ya aten du hkra hpyen yen ni hpe wa htaw la nga dingyang re,” nga nna tsun ai.

April 25 ya jahpawt daw kawn Myitkyina muklum kaw nna sinant kaba n sen ni matut manoi bai na taw sai lam Myitkyina ginra masha tsun ai re. Majan laja wa ai majaw Nam Ya, Kap Maw, Seng Hpra, Hkrai Run hte Gat Noi hkan na ni yawng koi yen ra ai hte hpyen yen ni hpe wa htaw la na mawdaw, nga shara, malu masha hka ni grai ra kadawn nga ai lam chye lu ai.

Myen hpyen dap gaw ya aten nnang nawn a majaw hten za mat ai hpe gaw sharawt masing ni nga ai majaw gan gap hkat jahkring ai lam n dau da tim dai shani kaw nna ya aten du hkra Jinghpaw mung kata hpyen n-gun tsa kaba jat bang nga dingyang re hte ya aten Jinghpaw mung shara shagu hta gasat gala majan grau laja nga ai re hpe chye lu ai.

Shiga- Pyilan U