Manmaw Ginra Kata Bat Mi Laman Hta Sha Y-12 N Bungli Bawm (70)Jan Lang Gap Bang

Pajau Media

May 12, 2025

Jinghpaw Mung Manmaw ginra gasat gala majan byin ai shata (5) daram na wa sai hte ya aten KIA pawng hpawm hpung maga kawn Myen hpyen dap shara law law hpe zing madu la lu sai raitim Myen hpyen dap gaw shani shagu Nbungli, Drone, lak nak kaba ni hte laja lana gap gasat nga dingyang re hpe chye lu ai.

Manmaw ginra de Myen hpyen dap kawn lai wa sai laban bat mi laman hta sha Y-12 N bungli bawm (75) lang, Drone (75) lang, Jet Fighter hte (19) lang, lak nak kaba (82) lang gap bang nna laja lana gap gasat nga ai lam KIA shiga dap kaw na chye lu ai.

Manmaw ginra gap gasat ai shata (5) laman KIA pawng hpawm hpung ni kawn Manmaw Muklum kata na Myen hpyen dap shara law malawng hpe zing madu da lu sai re hte Myen hpyen dap kawn ya na na zawn Nbungli Drone laja lana gap bun ai majaw Manmaw ginra hta hten za madang gaw tsa lam shadang 75% daram hten za mat sai lam shawng lam shi sawk ni kaw na chye lu ai.

KIA pawng hpawm hpung ni kawn Manmaw ginra de matut manoi htu shadut htim gasat nga dingyang re hta ya aten Ts.K.Hk (21), Manmaw muklum dingda maga nga ai Masat (47) dap ni hte Manmaw girna hta Myen hpyen dap shara (7) daram naw ngam nga ai lam shiga ni hta tang madunda ai re.

May shata tup gap hkat jahkring ai lam ndau da tim Myen hpyen dap gaw kata lagaw lam htu shadut ai hta N bungli hpe madung jai lang nna Manmaw ginra hpe htim gasat nga dingyang re lam mung chye lu ai.

Shiga- Pyilan U