Manmaw Ginra Majan Matut Manoi Laja Nga

Pajau Media

April 29.2025

Manmaw muklum kata naw ngam nga ai Myen hpyen dap shara hte dap jung ai shara law malawng hpe ya aten du hkra rawt malan hpung ni laja lana htim gasat nga ai lam Banmaw Scout Team kawn ndau da ai re.

KIA pawng hpawm hpung ni gaw Manmaw muklum kata naw ngam nga ai HK.L.Y (47) hte Ts.K.Hk (21) Dap ni hpe laja lana htu shadut htim gasat nga ai re lam tsun da ai re. Dai sha n-ga Myen hpyen dap shara jung da ai Manmaw pawng hpawm rung, Municipal Rung, Win Light Hotel, Kan U Jawng, Masat (1) hpaji jawng, Galaxy KTV hte ni nawn ai makau hkan htu shadut htim gasat nga ai re hpe chye lu ai.

Lai wa sai April 27 ya shana daw hta mung Myen hpyen dap shara jahkrat nga ai Kachin Su Lawk kaw na Robert KBC Nawku Jawng hte Masat (3) Jawng makau grupyin hta Rawt Malan Hpung maga ni htu shadut htim gasat zing madu la lu sai re. Dai kaw na hprawng wa ai Myen hpyen dap masha ni gaw ya aten Galaxy KTV maga de bai htu shadut nga ai re hpe chye lu ai.

Myen hpyen dap kawn nbungli, Drone ni hte htu shadut htim gasat ai lam, lak nak kaba gap bang ai lam ni shani shagu galaw nga ai majaw Manmaw muklum kata hten za ai lam, wan hkru ai lam ni grai law wa ai re hpe mung chye lu ai.

KIA pawng hpawm hpung ni hte Myen hpyen dap gaw April 2 ya kaw nna 22 ya du hkra gan gap hkat jahkring ai lam ndau ai hpang April 25 ya shani kaw nna Manmaw ginra de bai laja lana htu shadut wa ai gaw ya aten du hkra gasat gala majan laja nga ai re hpe mung chye lu ai.

Shiga- Htu Seng