Manmaw Ginra Myen Hpyen Dap A Ts.K.HK (21) Hpe Makawp Ninggang Shara N Kau Hpe Zing Madu La Lu Ai Lam

Pajau Media

May 27.2025

Manmaw muklum zing madu majan htim gasat ai shata (5) jan na wa sai re hte May 27 ya jahpawt daw kaw nna bai gasat gala majan laja wa ai hta Ts.K.Hk (21) hpe makawp da ai Myen hpyen dap shara n kau hpe KIA pawng hpawm hpung ni kawn zing madu la lu sai lam chye lu ai.

Manmaw ginra hpe Padang dip zing la na matu yak taw ai gaw Myen hpyen dap kawn mi moi kaw nna makawp ninggang dap shara ni hpe grai shagreng da ai majaw shata kaba hku htim gasat wa ai raitim Padang dip na matu yak taw ai masa re nga nna shawng lam shi sawk ni tsun ai.

May 27 ya jahpawt daw (4:00) Am aten daram kaw nna Ts.K.Hk 21 grup yin de gasat gala majan bai laja wa ai hta Myen hpyen dap shara la nga ai Win Light Hotel n tsa htap dap shara hpe KIA pawng hpawm hpung ni padang dip lu sai lam chye lu ai.

Ngam ai dap shara ni hpe zing madu la lu na matu mantut manoi htim gasat nga ai re. Ya Padang dip la lu sai Win Light Hotel ntsa kaw na Myen hpyen dap gaw Drone, Sniper ni hte laja lana gap gasat ai shara langai re. KIA pawng hpawm hpung ni hku nna mung Manmaw ginra hpe padang dip zing madu la lu na matu hpyen man law law hpaw nna htim gasat nga dingyang re hpe mung chye lu ai.

Myen hpyen dap gaw Manmaw ginra de lagaw lam htu shadut na hta n bungli, Drone bawm ni jai lang nna she madung htim gasat nga ai re majaw Manmaw muklum shara law malawng wan hkru hten za mat sai re. Myen hpyen dap makawp ninggang grai shaja da ai majaw lawan ladan zing madu la na matu yak hkak ai masa re hte KIA pawng hpawm hpung ni matut manoi htim gasat majan shang nga dingyang re.

Shiga- Pyilan U