Manmaw Ginwang Kata Gasat Gala Majan Laja Nga Ai Lam

Pajau Media Channel

10th May, 2024

Manmaw Nmawk hte Manje ginra mayan wunpawng mungdan shanglawt hpyen dap KIA hte Myen hpyen dap lapran gasat gala majan naw laja nga dingyang re lam chye lu ai.

March (7) ya shani kaw nna Manmaw Nmawk hte Manje ginra hta dap jung shara jahkrat nga ai KIA pawng hpawm hpyen hpung ni kawn htu shadut htim gasat dat ai hta dai ni du hkra gasat gala majan laja nga dingyang re.

Gasat gala majan hta Myen hpyen dap maga kawn n bungli bawm gap sharu bun ai lam, laknak kaba ni ladu lai gap bun ai majaw Nmawk hte Manje ginra kata nga mung masha ni asak si sum ai lam, mung masha dum nta hten za ai lam ni law law nga sai re hpe mung chye lu ai.

KIA hte Myen hpyen dap lapran hpyen masa gaw shaja hkat nga dingyang re hte May praw ( ya shana hkying (8:00) PM aten daram hta Myitkyina-Manmaw hkawm sa hkrun lam ntsa kaw na Dabak hka mahkrai hpe Shwe Nyawng Pin Hk.L.Y (321) hpung ni kawn bawm hte gap kapaw di kau ai re lam mung chye lu ai.

Hk.L.Y (321) dap ni kawn kapaw jahten kau ai Dabak hka mahkrai gaw hpyen masa hku nga yang mung grai ahkyak ai mahkrai langai re hte galu de Pe (100) jan nga ai mahkrai re. KIA hpyen hpung ni a March (7) ya kaw nna hpang ai htu shadut majan gaw May (7) ya shani shata lahkawng hpring sai re hte ya aten du hkra dap shara kaji kaba yawng (80) lahta htim gasat zing la lu sai re hpe mung chye lu ai.