Manmaw Majan Shani Shagu Laja Nga Ai Lam

Pajau Media

November 8, 2025

Manmaw Majan gaw November shata hta shata 11 na wa sai raitim ya aten du hkra zim ai lam n nga shani shagu majan laja taw ai re lam chye lu ai.

November 7 ya shani du hkra Manmaw Hk.L.Y 47 Dap, Deng 3 makau mayan, Nam Hpa, Tar Mai Lung, Manmaw Dakkasu Jawng makau mayan de Laknak kaba ni hte shawng gap sharu bun nna Lagaw lam hku mung htu shadut gasat nga ai re lam chye lu ai.

Gasat gala majan gaw shani shagu laja nga ai masa hta Myen hpyen dap maga na mung KIA zing madu da ai shara ni hpe bai zing madu ai lam n nga ai zawn KIA pawng hpawm maga na mung zing madu ai lam gaw n nga ai hte tinang madu da ai shara hpe n tat kau hkra makawp taw ai masa re hpe mung chye lu ai.

Mung masa maram masam nga ai ni tsun ai hta lai wa sai October shata laman Miwa Asuya hte KIO Ningbaw Ningla ni hkrum ai hpang Miwa Asuya Jarit Chyinghka ni hpe bai hpaw wa ai lam ni nga wa ai re hte Manmaw majan shazim na matu Miwa Asuya tsun shadut ai lam ni nga na masa nga ai lam tsun maram nga ma ai re.

Shiga ni mawng nga ai hta Miwa Asuya hte KIO hkrum ai hpang Manmaw majan zim taw ai nga shiga ni garu nga ai raitim ta tut hta gaw lahkawng maga hpyen masa grai naw shaja hkat nga dingyang re hpe mung chye lu ai.

Myen hpyen dap gaw Manmaw Ginra tat kau ai lam n nga hkra Hka Lam hku Hpyen Laknak n-gun ni lai wa sai July, August shata daram hta grai htaw jahting da ai hpang, Nbungli, Drone hte madang tsaw Laknak hpan hkum jai lang nna htim gasat ai majaw KIA maga na lu da sai shara n kau tat kau ra ai ni nga tim KIA Pawng hpawm hpung ni gaw bai lu la hkra matut htim gasat nga dingyang re hpe chye lu ai.

Shiga- Pyilan U