Manmaw Muklum Amyawk Dap 366 Hpe KIA Tat Sum Kau Ai Lam

Pajau Media

August 12, 2025

Jinghpaw Mung Manmaw htim gasat majan hta Myen hpyen dap kawn Nbungli hku, Drone hku nna laja lana gasat ai majaw Manmaw muklum kaw nna shara n kau hpe KIA pawng hpawm hpung ni tat kau da ra ai lam shawng lam shi sawk ni kaw na chye lu ai.

Gan yen kau da ra ai Dap gaw Amyawk Dap (366) hte nbungli pa shara ni re lam shawng lam shi sawk tsun da ai re.

“ 366 zing ai gaw teng ai nga tsun ma ai, mani gaw Manje maga de na sa wa ai ni tsun ai, shanhte hpe gaw hpyen la ni tsun dan ai nga tsun ai, lai wa sai bat daram hta zing mat ai re raitim nbungli pa hte seng na gaw hpa ntsun ai” nga nna mying n tsun mayu ai masha langai tsun ai re.

Myen hpyen dap Sanghpaw hpung ni du wa ai hpang Myen hpyen dap gaw madang tsaw ai Jak rai ni hte matut manoi htim gasat ai majaw KIA pawng hpawm hpung ni yen kau da ai ra ai re. Myen hpyen dap madi shadaw ai Telegram group hkan mung Manmaw ginra Awng Dang lam nga nna sumla ni grai mara wa ai re hpe mung chye lu ai.

Lai wa sai July 17 ya shani Mandalay Sanghpaw Daru kaw nna Sanghpaw 17 gaw Shwegu de du hkra lung wa nna Sanghpaw 6 daram gaw Lam lapran kaw Rawt malan hpung ni kawn htim gasat kau lu ai re. August praw 1 ya shani hta gaw Manmaw de Sanghpaw 9 du shang wa ai re lam mung chye lu ai.

Manmaw de du shang wa ai Sanghpaw hta Myen lak nak arung arai htaw shalai wa ai re hte August 4 ya shani kaw nna Myen hpyen dap Nbungli, Drone ni hte sha n-ga Lagaw lam mung htu shadut ai majaw gasat gala majan laja nga ai re hpe mung chye lu ai.

Shiga- Hpring