Manmaw Myitkyina Hkawm Sa Hkrun Lam Myen Asuya Hpyen Dap Laja Lana Sawk Jep

Pajau Media Channel

5th February,2024

Majan a majaw hkawm sa hkrun lam shata lahkawng daram pat tawn da ai Myitkyina-Manmaw hkawm sa hkrun lam hta tara shang bai hpaw wa ai hpang kaw nna Myen asuya hpyen dap kawn hkawm sa mawdaw hte jawn lawm ai mung masha ni hpe du hkra azing ayang jep joi ai majaw mung masha ni myit shim lam nlu ai nga nna hkrun lam hkawm masha langai tsun ai.

Myitkyina-Manmaw lam kaw san jep shara law law nga ai hta shara n kau kaw yu nna lam hkawm ra ai, n kau hkan gaw Mung Chying Masat jep joi ai lam galaw ai re, san jep ai lam hta amyu shayi ni hpe Dinghku hte re, nre ni du hkra jep joi ai masa lam ni nga ai majaw myit shimlam n lu ai nga nna asak (25) ning re ai hkrun lam hkawm amyu shayi langai tsun ai re.

“Ngai Myitkyina kaw nna Manmaw de sa ai, jep joi shara ni mung grai law ai, Mung Chying Masat lang nna lam hkawm ra ai shara ni nga ai, Myen hpyen dap jep joi shara du ai hte ngai hpe mahkawn i? dinghku de sai i nga san jep ai, lit nga ai hte maren san jep ai re nga tsun ai. Lit nga ai majaw san ai nga tim dai hku gaw n mai san ai rai nga, dai hku san ai majaw ngai na matu myit shim lam n lu ai, ngut na ngai na makau kaw dung ai wa hpe mung asuya magam gun rai n rai ni mung san jep ai, lai wa sai ten hta mung jahkring hkring hkrun lam hkawm ga ai ya na zawn san jep katut ai n dai kalang sha re”.

Myen asuya uphkang wa ai hpang kaw nna ahkaw ahkang yawng hpe Myen asuya hpyen dap jum tek kau ai re hte majan byin law ai jinghpaw mung, Sagaing ginra hte Sam mung ginra ni hta matut mahkai lam hpe mung shanhte kam ai ten hpaw pat galaw nga ai re, Myitkyina-Manmaw hkawm sa hkrun lam ntsa kaw mung matut mahkai ph line nlu ai shara ni nga ai re majaw hkawm sa na matu pyi grai myit tsang ai lam hkawm sa masha langai tsun da ai re.

“Ngai gaw Manmaw-Myitkyina de bungli hte seng nna jahkring hkring hkawm ai, shawoi nga yang nbungli hte hkawm ai, n dai kalang gaw nbungli lak mat lu na matu grai yak ai majaw mawdaw hku hkawm ai, lak nak lang hpung ni a san jep shara (8) daram nga ai, Myen asuya hpyen dap gate kaw ngai hpe hpa baw amyu rai nga nna san jep nga ai, Hkrun lam hkawm mung masha ni hpe hpa zawn n nawn ai masa re” nga nna asak (73) ning re ai salang langai tsun ai re.

Myitkyina-Manmaw lam de majan sawng wa ai 2023 August shata daram kaw nna hkawm sa hkrun lam pat tawn da ai re, tara shang bai hpaw ai lam gaw n nga ai raitim mung masha ni gaw ra ai hta hkan nna hkawm sa nga dingyang rai nga ai hta ya na zawn laja lana sawk jep ai masa lam ni a majaw myit shim lam n lu ai nga nna Mung masha ni tsun ai kaw na chye lu ai.

Shiga -Kachin Tar