Maran kahtawng kaw na rim hkrum ai Salang (5) hpe bai dat ya sai shiga

Pajau Media Channel

Mogaung ginwang Maran kahtawng na Mare masha marai (5) hpe November (25) ya shani Myen hpyen gumshem dap hpung ni kawn rim woi mat ai re lam nga ai rai nna November (28) ya shani hta bahkam hte bai dat ya sai re lam mare masha ni kaw na chye lu ai.

Rim hkrum ai mare masha marai (5) mare kaw nna Hpung magam gun ni, mare kata na lit nga myit su salang ni kawn sa du tsun jahkrup nna bai dat ya ai masa re lam mung chye lu ai. Ya aten mare kata mung masha ni gaw grai sadi maja let nga ra ai re, Maran Kahtawng mare masha ni gaw gan koi yen mayu ai raitim Koi yen n mai mat rai di yak nga ai lam Hpawmi Jan Hpauyam Bawk tsun ai hta “ Myen ni gaw kadai n mai hprawng ai nga masha n nga ai nta ni hpe nat kau ya na nga ai ngai chyawm ya Nawngpung mare Jinghku nta kaw koi yen taw ai ” nga nna tsun ai re.

Mare kata na Hpung magam gun ni hte Mare Salang zawn re ai ni hpe gaw Myen hpyen gumshem dap hpung ni dingyang yu taw ai re majaw koi yen n mai sawng byin nga ai re lam mung chye lu ai. Mare masha kata na asak kaba sai gumgai dingla ni hte Ma kaji ni hpe gaw ni nawn ai mare Kahtawng na Jinghku Jingyu dum nta hkan gan sa da ai lam, n kau gaw tinang arung arai ni hpe mai byin ai daram zing nga ai masa byin nga ai re lam mare masha langai tsun da ai.

Myen hpyen gumshem dap ni gaw mare masha ni nga ai ginra de mung lak nak hkrup mara gap bun ai majaw Mare masha langai Bawm hkyep hkra hkala ai lam nga ai re hpe mung chye lu ai.

Myen hpyen gumshem dap hpe KIA, KPDF pawng hpawm hpyen hpung ni November (25) ya shani htim gasat ai hpang mare kata masa grai shuk shanut mat ai hta mare masha ni gaw hprawng yen ra na zawn, nga ra na zawn rai nna grai nga jam jau ai masa byin nga ai lam Mung mare masha ni tsun ai kaw na chye lu ai.