Marang Htu Sawng Ai Majaw Myitkyina Chihpwi Pang Wa Hkawm Sa Lam Gyi Ru Hten Za Mat Ai Hpe Ya Mawdaw La Ni Mai Byin Ai Daram Lam Jasan Nna Hkawm Sa Nga

Pajau Media

June 3.2025

Jinghpaw mung kata marang htu sawng ai majaw Myitkyina Chihpwi Pang Wa hkawm sa lam ga gyi ru hten za ai majaw ya aten hkawm sa hkawm wa yak nna mawdaw la ni gaw mai byin ai daram jasan nna hkawm nga ai lam chye lu ai.

“Ndai laman htu ai marang a majaw Chihpwi hte Pang Ea lapran ga gyi nna lam pat mat ai. Ngut na Chihpwi hte Myitkyina lapran lam ni mung hka tung kaba wa ai lam nga ai. Hkawm sa hkrun lam mung grai yak ai,” nga nna Myitkyina – Pang Wa lapran hkawm nga ai mawdaw la tsun ai.

 Chihpwi Pang Wa mawdaw lam deng (59) shara kaw mung ga gyi ai majaw mawdaw la ni mai byin ai hku jasan jaseng nna lai hkawm sa nga ai re. Shawoi na zawn hkawm sa mai na matu Back Hole hte ganaw galaw nga ai lam mung matut tsun ai.

“Ga gyi ai majaw lam pat mat ai Chihpwi Pang Wa Deng (59) lam hpe mawdaw langai mai lai na daram sha galaw da ai, lam mai kaja hkra gaw Back Hole hte bai galaw hkyen ai."

Chihpwi Waimaw hkrun lam mung marang htu sawng hka kaba ai majaw ga gyi nna hkawm sa hkrun lam yak hkak nga ai re. Ya aten cycle hkawm sa mai madang sha naw re hte maw daw ni hkawm sa na matu gaw naw yak nga ai madang re lam chye lu ai.

Ya aten hka hpyen tsin yam hkrum ai mung masha law law nga ai rai nna hkyak hkyak garum ningtum ra kadawn nga ai hte mawdaw lam pat ai majaw gunrai taw ai mayak ni hkrum katut na hpe ginra masha ni myit tsang nga ma ai re.

Shiga- Hpring