Marang Law Ai Shaning Re Majaw Putao Ginra Mung Masha Hkau Na Galaw Lu Galaw Sha Yak Hkak Na Hpe Myit Tsang Ai Lam

Pajau Media

May 6.2025

Putao ginra kata dai ning gaw lanam ladaw n du shi tim marang ladu lai htu sawng ai hkrun lam ni hten za hte n dai masa hku rai yang Hkau na galaw lu galaw sha pyi yak hkak wa mai ai lam tsun nga ma ai re.

“Shata man langai hkan na pyi marang htu ai aten grau law sai,Hkawng Lang Hpu maga de mung lam grai hten na pyi n mai hkawm ai, masha si ai daram du hkra byin ai nga na ai, dai ginra de gaw matut mahkai grai yak ai majaw shiga tup hkrak sagawn la na matu yak taw nga, n dai bat laman chyawm Putao kaw jan mai ai ga rai nga, hkau na hkai ten she tsang ra ai hka kaba na hkau na nlu hkai na she myit tsang ai ” nga nna Putao ginra masha tsun dan ai re.

Lanam ladaw gaw hkau na galaw sha ai ni bungli shang ai aten mung re, raitim dai ning putao ginra hta marang htu sawng, hka kaba yang hkauna hkai sha n mai ai majaw hkau na galaw let kan bau ai ginra masha ni myit tsang nga ma ai re hpe mung chye lu ai.

Lamu marang maram masam hpaji ninghkring tsun ai hta Myen mungdan kata dai ning gaw shawoi shaning ni hta grau nna marang htu shadang law na hte du hkra ladaw hpyen grai ladi maja ra ai lam ni tsun hpaji jaw da ai re hpe chye lu ai.

Myen mung du hkra ladaw maram masam ai hpaji ninghkring U Win Naing kawn mung du wa na May shata 18 -19 ya laman hta mung Marang ladu lai htu sawng na Kumla ni mu mada ai majaw Jinghpaw mung hte Myen mung lawu daw ginra ni hta hka kaba wa mai ai lam mung tsun maram da ai hpe shiga ni hta tang madun da ai.

Shiga- Pyilan U