Mare Kata Hkan Myen Hpyen Dap ngam kau da ai Bawm Yam Lak Nak Kapaw Hkala La Ai Manghkang Ni Byin Nga Sai Lam

Pajau Media

May 29.2025

Myitkyina Hpakant lam mayan de May praw kaw nna Myen hpyen shamu shamawt htu shadut wa ai majaw ya aten Hpyen koi yen nga ma ai hte n kau gaw Mare hte nau ntsan ai Nam hkan koi yen ai hta hpyen masa zim ai aten hkan Mare jahkring jahkra wa gawan ai aten bawm kapaw asak si sum ai mabyin ni nga wa sai re.

May shata (27) ya shana daw hkying (5) aten daram hta Seng Hpara Mungga N Nan Nawku jawng wang kaw Bawm hta gasup ai majaw Ma kaji (2) asak si sum mat ai re. Dai Ma Yan gaw Slg Marip Sut Ring hte Jan Jum Hpawk Kaw Yan a kasha Shd. Marip Sut Seng Awng asak (12) ning hte Shd. Marip Sut Seng Naw Yan re hte dai shara kaw nan kalang ta asak si sum mat ai lam chye lu ai.

 Myen hpyen dap gaw Mare kata de du shang ai hte Nawku Jawng, Hpaji jawng hkan shara la nga ai re hte dai hkan Hpyen lak nak bawm yam ni hpe hkrup mara kabai ayai da ai majaw ya na zawn Mung masha asak si hkala hkrum wa ai re.

 Myen mungdan kata hta Gasat gala majan hpang ngam kau da ai Lak nak bawm ni a majaw asak si sum ai lam laning hte laning law wa ai hte Mungkan Madang hku yu yang Myen mungdan gaw Hpyen lak nak bawm a majaw asak si sum law dik Mungdan kaw lawm wa sai lam shiga ni hta sawk sagawn tang madun da ai.

N dai manghkang gaw Jinghpaw Mung sha n-ga Myen mungdan ting ngu na daram hta byin nga ai re hte grau nna gaw Myen hpyen dap uphkang ai hpang 2023 hpang daw kaw nna grau sawng wa ai re hpe chye lu ai.

UNICEF kawn tang madun da ai hta 2024 shaning n nan kaw nna shata (9) Myen mungdan ting hta bawm a majaw asak si sum ai masha (130) nga nna Lagaw, Lata Hkum hkrang hkala hkrum ai masha (759) nga ai lam tang madun da ai kaw na chye lu ai.

Shiga – Pyilan U