Mawsi Za (Thaya Kung) Makau Grupyin Ni Hta Myen Hpyen Dap Hte KIA Lapran Gasat Gala Majan Laja Nga

Pajau Media

June 10, 2025

Hpakant Lawng Hkang, Mawsi Za (Thaya Kung) makau grup yin ni hta Myen hpyen dap kawn 60 MM ngu maram lu ai laknak kaba gap ai majaw lahkawng maga gasat gala majan laja nga ai lam shawng lam shiga kaw na chye lu ai.

“Mare hte Thaya Kung kaw laknak hte gap bun taw nga ai, dai maga de mung masha ni mung nga ai, Myen hpyen dap gaw hkrup mara gap shadam taw ai re.”

Myen hpyen dap hpung ni gaw Lawng Hkang lam dingyang kaw naw nga ai majaw ginra masha ni Lawng Hkang sha n-ga Mawsi Za, Kade Maw hte Namma Hpyit lam ni hkan hkawm sa hkawm wa sadi nna hkawm sa ra ai lam mung chye lu ai.

Myen hpyen dap hpung ni gaw Hpakant Muklum kata hpyen hpung hku nna shamu shammawt du shang wa ai hpang ginra masha n kau hprawng koi yen hkawm nga ma ai re hte n kau gaw ginra kata kaw naw shanu nga ma ai re. Myen hpyen dap hpung ni kawn mung Mung masha ni shanu nga ai ginra ni, hpung gyi jawng hkan dap shara jahkrat nga ai lam mung chye lu ai.

Kachin Human Rights Watch- KHRW kawn tang madun da ai hta June praw 1 kaw na praw 8 ya laman Myen hpyen dap hpung ni kawn Hpakant ginra kata masing nga nga hte wan nat jahten sharun ai lam (11) lang galaw ai lam sawk sagawn tang madun da ai re.

Shiga- Hpring