Mawsi Zar Hpaji Jawng Makau Kaw Mung Masha Marai Masum Hpe Gap Sat Da Ai Lam

Pajau Media

June 12. 2025

Hpakant Mawsi Za Hpaji Jawng, Mare Lam braw makau kaw June 12 ya jahpawt hkying 7 grup yin Mung masha marai (3) hpe cycle jawn ai laknak lang ai hpung ni kawn gap sat da ai re lam mying n tsun mayu ai myi chyaw mu ginra masha langai tsun ai kaw na chye lu ai.

Myi chyaw mu ginra masha tsun ai hta “ cycle hte sa nna wa gap da ai re, sinat nsen 4,5 lang na dat ai, wa yu yang sinat kadun lang da ai hpung ni cycle hte hprawng mat ai, ngut na lam ntsa kaw masha marai 3 gaw sai hkrai re taw sai” nga nna tsun ai.

Gap sat hkrum ai Mung masha marai (3) gaw asak (20) ning jan kaw na (30) ning lapran na ni re hte Ye mase tam ai bungli galaw masha ni rai nna hpa majaw ya na zawn gap sat ai ngu hpe gaw n chye ai nga nna tsun ai re.

N dai mabyin hte seng nna ginra masha langai tsun ai hta “ Hpakant kaw gaw masha hpan hkum shanu nga ai re, moi kaw masha sat manghkang jahkring hkring byin ai, lak nat lang hpung ni mung langai sha nga ai nre, ya grau sawng sai, Lam ntsa kaw shinggan bu hpun palawng hte sinat hpye nna nga hkawm ai, aw ra kaw gap n dai kaw gap hte tara Upade Ka-up ai lam tsep kawp n nga , yawng gaw law hpa myit hte kam ai hku nga ma ai” nga nna tsun ai.

Hpakant ginra kata n dai laman Myen hpyen dap hte KIA lapran gap gasat ai lam nga ai hte hpyen masa shaja hkat nga dingyang re, ya aten Muklum kata, lawk hkan mung sinat kapaw n sen jahkring hkring na ai lam chye lu ai.

Ya aten du hkra Hpakant ginra hta Myen hpyen dap pawng hpawm hpung ni hte rawt malan hpung ni lapran hpyen masa shaja hkat nga ai re hte KIA pawng hpawm hpung ni kawn hpyen shamu shamawt ai lam dingyang nga ai re hpe mung chye lu ai.

Shiga- ND