Mawsi Zar Kaw Lak Nak Kaba Wa Hkrat Nna Mung Masha Marai (6) Hkala Nna Amyu Shayi Langai Si Sum Ai Lam

Pajau Media

July 31, 2025.

Hpyen masa shaja hkat nga ai Hpakant ginra hta July 30 ya shana hkying 8:50 PM aten daram hta Mung masha ni nga ai Lawk de lak nak kaba wa hkrat kapaw ai majaw ginra masha asak si sum, hkala ai lam nga ai re hpe mung chye lu ai.

Lak nak kaba gaw Mawsi Zar mare Phyu Sin Kung Maw Lawk kaw wa hkrat kapaw nna amyu shayi langai (1) si nna yawm htum marai (6) hkala ai lam chye lu ai.

Mawsi Zar mare masha langai tsun ai hta “ Mung masha ni nga ai lawk de lak nak kaba hkrat ai majaw marai (6) ram hkala mat ai, yawng gaw Mung masha sha re, amyu shayi langai gaw si sum mat ai, langai gaw lagaw kaw hkala nna tsi rung de gaw n hkan mat ai, ngam ai ni gaw yawng tsi rung du mat sai, kata lam masa hpe gaw atsawm nchye shi ai” nga nna tsun ai.

Ginra masha ni gaw ya aten shaja hkat ai hpyen masa a majaw sha n-ga hkrun lam pat taw ai masa ni a majaw hprawng koi yen hkawm shara n nga ai hte Hpakant Muklum kata hkan sha chyat rawng nga ra ai lam chye lu ai. Hpakant ginra hta Myen hpyen dap gaw shani shagu N bungli bawm, drone, Lak nak kaba ni gap sharu bun nga dingyang re lam chye lu ai.

Shiga- ND