May Shata Laman Myen Hpyen Dap A Majaw Amyu Shayi Marai (92) Asak Si Sum Nna Marai (81) Hkala Hkrum Ai Lam Burmese Women’s Union Kawn Ndau

Pajau Media

June 6, 2025

Myen hpyen dap kawn mungdan daru magam zing madu ai 2021 ning hpang kaw na 4 ning laman Myen hpyen dap hpung ni a shinggyim ahkaw ahkang tawt lai dingsa gasat ai majaw May shata laman amyu shayi marai (92) asak si sum nna marai (81) hkala hkrum ai lam Burmese Women’s Union kawn n dau da ai re hpe chye lu ai.

May shata laman Myen mungdan ting hta amyu shayi marai 92 asak si sum ai hta Myen hpyen dap n bungli bawm hkrup mara jahkrat ai majaw marai 82, Myen hpyen dap kawn mare kahtawng mung masha dum nta ni hpe masat shingte tawn nna lak nak kaba hte gap gasat ai majaw marai (4), rim zingri sat hkrum ai marai (4), htawng kata tsi gawn lajang ahkang n lu ai marai (1) hte mazut roi rip ai majaw si hkrum ai marai (2) re lam chye lu ai.

Asak si sum ai marai (92) kaw na marai (29) gaw asak (18) ning n pu amyu shayi ni re lam chye lu ai. dai sha n-ga hkala hkrum ai amyu shayi marai (81) mung n bungli bawm a majaw marai (70), lak nak kaba a majaw marai (7), hkam bawm a majaw marai (3), mazut roi rip hkrum ai majaw marai (1) re lam chye lu ai.

 May shata laman asak si sum law dik ai gaw Sagaing ginra kaw na marai (41) hte law dik rai nna Rakhine mung kaw na marai (16), Mandalay ginra na marai (14) re hpe mung chye lu ai. Jinghpaw mung kaw gaw amyu shayi langai asak si sum ai lam nga ai re hpe mung chye lu ai.

Myen hpyen dap uphkang wa ai 4 ning laman Myen mungdan kata dingsa gasat ai lam, mara kata mung masha ni hpe rim zingri sat ai lam ni shani shagu ngu na daram byin nga ai re hpe mung chye lu ai.

Shiga- Htu Seng