May Shata Laman Myen Hpyen Dap Kawn Mungkan Hpyen Tara Tawt Lai Nna Mung Masha Ni Hpe Zingri Sat Kau Ai Jahpan Kachin Human Rights Watch- KHRW Ndau

Pajau media

June 4, 2025

Myen hpyen dap gaw mungdan daru magam zing madu ai hpang mungkan hpyen tara tawt lai nna Jinghpaw mung kata May shata laman mung masha marai (38) hpe zing ri sat ai lam nga ai hpe Kachin Human Rights Watch- KHRW kawn n dau da ai re.

Myen hpyen dap kawn Jinghpaw mung kata na mung masha marai 38 hpe sat kau ai sha n-ga mung masha marai (5) gaw laknak kaba a majaw hkala sawng ai lam nga ai hte marai (7) gaw mara kata rim hkrum ai lam tsun da ai re. Ya n dau da ai lam gaw ta tut byin nga ai masa hte loi shai hkat ai lam gaw nga mai ai lam tsun da ai re.

May ( ya shani Jinghpaw mung a numbat lahkawng kaba dik Manmaw muklum hta hpyen yen mung masha ni shanu nga ai nawku jawng wang de Myen hpyen dap kawn gap dat ai n bungli bawm a majaw hpyen koi yen mung masha yawm htum marai (30) hkawt asak si sum ai re lam tsun da ai re.

Dai sha n-ga Waimaw ginra hta mung May 16,18 ya laman hta Myen hpyen dap a hkam bawm hte laknak kaba a majaw mung masha marai (3) hkala hkrum ai lam mung nga sai re.

Hkala hkrum ai kaw na asak (32) ning re ai Ko Ar Mu Tu gaw May 16 ya shani hkam bawm a majaw la hkra lagaw daw mat ai re. Asak (10) ning re ai Mg Ya Li mung May 18 ya shani laknak kaba a majaw shingma kaw hkala ningma lu mat ai sha n-ga asak (65) ning re ai U Pawng Yin mung laknak kaba a majaw hkala hkrum ai lam nga sai re.

May 24 ya shani hta mung Mohnyin muklum He Pa mare kaw na asak (62) ning re ai U Chan Maung hte Asak (58) ning madu jan Daw Hkin Pyung yan mung laknak kaba hkra nna asak si sum mat nna asak (50) ning re ai Daw Tin Nu mung lagaw hkala sawng mat ai hta tsi tsi hkam la ai manga ya na ai hpang asak si sum mat ai lam chye lu ai.

Dai sha n-ga Hpakant ginra Seng Hpara mare kaw mung Myen hpyen dap ngam kau da ai bawm hpe hta gasup ai ma Sut Seng Awng hte Sut Seng Naw yan mung May 27 ya shani bawm kapaw asak si sum ai lam byin lai wa sai re. May 28 ya shani Hpakant Lawng Hkang mare kata Myen hpyen dap kawn mung masha marai (5) hpe rim sat kau ai sha n-ga hpyen ninggang shatai nna marai (7) hpe rim woi mt ai lam nga ai hte Rainbow Mobile Phone Seng kaw mung mung masha langai hpe gap sat da ai lam chye lu ai.

Jinghpaw mung kata byin ai gasat gala majan laman mung masha hkying kaba hprawng koi yen ra ai hta shinggyim nau na garum ningtum lam ni grai ra kadawn nga ai re.

Shiga – Htu Seng