Mi Hprap Wan Nlu Mat Ai Shata 3 Na Ai Hpang Hpakan Ginra Hta Mi Hprap Wan Bai Lu Ai Lam

Pajau Media

September 29, 2025

Jinghpaw mung daw Hpakan ginra hta mi hprap wan nlu mat ai shata masum na ai hpang September 27 ya shani hta bai lu sai lam Hpakan ginra masha langai tsun ai kawn chye lu ai.

Hpakan ginra hta lai wa sai July shata 9 ya shani kaw na mi hprap wan nlu mat ai rai nna 66 Kilovolts wan n-gun line dingyang nbung marang a majaw wan sumri wan shadaw hkan na hpun lakung ni hpe jasan jaseng ai lam galaw nga ai majaw mi hprap wan nlu mat ai shata masum ram na mat ai lam hpe Hpakan mi hprap rung kawn ndau da ai.

Mi hprap wan bai lu sai rai tim Hpakan maga na datwan sumri hpe sha lu jaw nna Lone Khin hte Sike Mu hkan wan n-gun n lu jaw shi ai re. Hpakan hpe yawng lu shapraw jaw ai hpang matut galaw na lam hpe mung chye lu ai.

"Hpakan maga lu sai ngu gaw na ai. Lone Khin maga gaw nlu shi ai lu yang mung wan gaw dingyang sa na ngu n shadu ai, solar wan hte pa grau hkrak ai" nga Lone Khin ginra masha langai tsun ai.

Lone Khin hte Sike Mu mare na ngam ai shara ni hta mi hprap wan bai lu sai rai tim mi hprap wan nlu ai na sai re majaw wan sumri ni hpe lagut ni lagu la kau ya sai re majaw wan sumri bai mari shakap ai hta mung masha ni gumhpraw bai ma ra ai lam mung ginra masha ni kawn chye lu ai. Dai majaw gumhpraw ma hkam nna bai shakap da tim wan nsa ai ten grau law wa yang mi na raw bai byin na tsang nga ai lam hpe chye lu ai.

Jinghpaw mung daw hta Myitkyina, Wai Maw, Mohnyin, Namti, Hopin, Namma, Hpakant muklum ni gaw Chihpwi hka wan jak kaw na 40 MW garan lang taw ai lam hpe chye lu ai.

Shiga-Zaw