Miwa Gunrai Htaw Mawdaw Ni Grai Chyat Ai Majaw Mung Masha Hkawm Sa Hkawm Wa Yak Hkak Ai Lam

Pajau Media

November 21, 2025

Miwa gunrai htaw mawdaw kaba ni grai shang ai majaw Myitkyina Waimaw matut da ai Mahkrai kaba kaw gunrai mawdaw ni grai chyat ai majaw mung masha ni lai wa lai sa grai yak hkak nga ma ai re lam chye lu ai.

 “ Shana daw hkying 5 daram nga yang Miwa gunrai htaw mawdaw ni Myitkyina maga de rap na matu matut manoi shang wa ai, dai kaw hpyen la ni gaw gumhpraw hta sha gashun gashe rai, shana shagu re, kalang lang gaw mawdaw nau chyat na lai wa lai sa mung masha ni mahtang lam yen ya ra ai, koi lam hku she bai lai ra, Hpap Tau la ga ai nga kap ai kaw na Mahkrai pawt du hkra mawdaw ding ren ai, tsam mari she lai lu ai” nga nna ginra masha langai tsun ai re.

Dai Bala Min Htin mahkrai kaba kaw gaw lai wa lai sa mung masha ni hpe hkap jahkring jep joi ai lam ni dingyang galaw nga ai shara re sha n-ga shana shagu gunrai htaw mawdaw kaba grai chyat ai majaw hkawm sa hkawm wa grai dut dang ai hte gunrai mawdaw ni hpe aten masat nna shalai yang kaja ai nga nna ginra masha matut tsun ai

“Shana de nta wa ten grai myit ru ai, mahkrai gaw hkying 7 kaw pat sai, n pat ai aten lu hkra lai ra ai, loi hpang hkrat ai hte kalang lang gaw hkap jahkring jep shatsang ai, dai kaw gunrai mawdaw ni gaw bai chyat rai na yak ai, Mawdaw ni hpe masat nna shalai yang kaja ai” nga nna Mai Na ginra masha langai tsun ai re.

Ginra masha ni tsun ai hta Muklum kata Lawk ni hkan gunrai htaw mawdaw kaba n shang na matu masat da ai lam ni nga ai raitim Myen hpyen dap gaw mawdaw la ni kaw na gumhpraw hta sha nna shalai bang tik tik rai nga ai masa re hte gumhpraw hta ai ni mung Mai Na shang wa ai kaw hkap nna gumhpraw hta sha nga ai re

Jinghpaw Mung Miwa jarit chyinghka hpe lai wa sai October 25 ya kaw nna Miwa maga kawn tara shang hpaw dat ai re hte Namsi Nam saw hte dum nta gaw gap arung arai ni hte N ba Sumpan zawn re ai ni hpe shalai ya nga ai re hpe mung chye lu ai.

Shiga – Pyilan U