Miwa Jarit Chyinghka Ni Bai Hpaw Sai Raitim Pang Wa, Hpimaw Ginra Jarit Mayan Gaw Ya Du Hkra N Hpaw Shi Ai Lam

Pajau Media

8.April.2025

Jinghpaw Mung Miwa jarit lam Laiza, Mai Ja Yang hte loi Je shagyit ni hpe bai hpaw ya sai raitim Pangwa, Hpimaw hte Kanpaiti shagyit ni gaw dai ni du hkra hpaw ya ai lam n nga shi ai re hpe mung chye lu ai.

“ Mai Ja Yang, Loi Je hte Laiza shagyit ni hpe tara shang hpaw sai re, Pangwa , Hpimaw hte Kanpaiti shagyit ni hpe gaw ya aten du hkra hpaw ya ai lam n nga shi ai re, kade n na ai aten bai hpaw ya na nga gaw tsun ai, galoi hpaw na ngu gaw tup hkrak n chye lu shi ai” nga nna Pangwa ginra masha tsun ai.

Ya aten tara shang n hpaw shi ai jarit mayan hta gunrai htaw shalai la na matu shagyit lai ahkun hkan se law law jaw nna htaw shalai la ai majaw miwa gunrai ni manu grai rawt nga ai re lam jarit mayan gunrai hpaga galaw ai masha langai tsun ai re.

“Shagyit ni hpe tara shang hpaw ya ai lam n nga ai majaw gunrai ni hpe ahkun hkan se law law jaw nna htaw la ra ai, dai majaw miwa gunrai ni manu grai rawt taw ai re” nga nna tsun ai.

Jinghpaw mung Miwa jarit hpe 2024 October shata hta Myen mungdan mung masa a majaw pat da ai hpang ya aten Miwa jarit chyinghka n kau hpe bai hpaw ya sai re. Ngam ai jarit chyinghka ni hpe mung lawan bai hpaw ya na hpe mung masha ni ra sharawng nga ma ai re.

Mai Ja Yang, Loi je, jarit chyinghka ni hpe March 28 ya kaw nna hpaw hpang nga sai hte Laiza shagyit hpe gaw April 1 ya kaw nna hpaw ya ai re. Naw ngam nga ai jarit chyinghka ni hpe mung kade n na ai aten hpaw sa wa na rai nna galoi aten ngu ai hpe tup hkrak n tsun da ai re.

Shiga- Hpring