Miwa Jarit Tara Shang Hpaw Ai Lam N Nga Tim Ga Sau Htu Shaw Ai Kaw Lang Ai Nam Hpun ni Hpe Htaw Shalai Nga Ai Lam

Pajau Media

July 7.2025

Jinghpaw Mung Chihpwi ginra hta Miwa jarit chyinghka ni hpe tara shang hpaw ai lam n nga ai raitim Ga Sau htu shaw ai kaw jai lang na Nam hpun zawn re ai gunrai ni hpe Asuya ya lahkawng maga jahkrup nna Hpimaw shagyit hku nna shalai la ai lam chye lu ai.

“ Shagyit gaw ya du hkra n hpaw shi ai, raitim Ga Sau htu shaw ai lam galaw nga ma ai, dai kaw lang na Nam hpun ni hpe mung dai shagyit kaw nna shalai la ma ai, Asuya lahkawng maga hte jahkrup nna galoi aten hkan htaw shalai na ngu ai masa hte galaw nga ma ai re” nga nna mung tsun ai.

Lai wa sai shaning Decmeber 13 ya kaw nna Miwa hte KIO lahkawng maga jahkrup bawng ban ngut ai hpang Jinghpaw Mung kata gunrai htaw ginlen ai Miwa shagyit yawng hpe bai hpaw sai raitim chihpwi ginra kata na shagyit chyinghka ni hpe tara shang hpaw ai lam n nga ai re hpe mung chye lu ai. Jarit shagyit ni hpaw ai lam n nga ai raitim chihpwi ginra kata Ga Sau htu shaw ai dabang ni bai hpaw nna Ga Sau htu shaw ai lam dingyang galaw nga ma ai re.

ISP Myanmar kawn ndau da ai hta Chihpwi ginra kaw na Ga sau ni hpe Pangwa, Chihpwi, Hpimaw, Gangfang hte Kanpaiti jarit hku nna Miwa mungdan Thing Chung ginra de htaw shalai la nna N mawk ginra na pru ai Ga Sau ni hpe gaw Mai Ja Yang shagyit hku nna Miwa Lung Chyun hte Yin Jang ginra de shalai ai re hpe mung chye lu ai. Ga Sau pru ai Shara rai nga ai Pangwa Chihpwi ginra gaw Jarit sin hpyen hpung ni uphkang ai ginra re sha n-ga Miwa kawn Ga Sau htu shaw ai lam law dik ginra re hpe mung chye lu ai.

Shiga- Hpring