Miwa Jinghpaw Mung Jarit Shagyit Bai Hpaw Sai Lam

Pajau Media

October 27, 2025

Pat da ai na sai Jinghpaw Mung Miwa Jarit Laiza, Mai Ja Yang hte Loi Je Shagyit ni hpe bai hpaw sai lam chye lu ai.

Miwa Asuya hte KIO Asuya bawngban hkrum ai lam galaw ai hpang October 25 ya shani bai hpaw ai rai nna hpa baw myit hkrum lam ni a majaw Jarit hpe bai hpaw ai ngu hpe gaw n chye lu shi ai re.

"Shagyit ni hpe bai hpaw ai gaw Laiza, Mai Ja Yang hte Loi Je shagyit hkan gaw masha lai gaw n mai shi ai, malu masha gunrai hte kaga gunrai ni hpe shalai ai, n dai maga kaw na gaw Miwa Langu si shalai ai, hpa baw ni myit hkrum lam lu ai gaw n chye ai" nga nna ginra masha ni tsun ai.

Shagyit ni bai hpaw tim malu masha gunrai ni hte kaga gunrai n kau hpe sha htaw shalai mai ai re hte Jak rai hte seng ai gunrai ni hpe gaw n shalai ai re hpe chye lu ai.

Gunrai ni hpe bai shalai sai re majaw gunrai manu ni yawm na hpe ginra masha ni myit mada ra sharawng nga ma ai re hpe chye lu ai.

Jinghpaw hte Miwa jarit hpe lai wa sai 2024 October hte November kaw nna Pangwa, Chyihpwi, Kanpaiti Ginra hpe rawt malan hpung ni htim gasat zing madu ai hpang kaw nna pat kau ai re hpe chye lu ai.

Shiga - Zau