Mogaung Ginra Kaw Mung Masha Langai Bawm Kabye Kapaw La Ai Lam

Pajau Media

September 24.2025

Mogaung Ginra Deng 8 mare kaw na Slg langai gaw September 23 ya shani Dumsu mat mat na hkan tam ai kaw hkam bawm kabye kapaw la ai lam shinggyim nau na garum hpung ni tsun ai kaw na chye lu ai.

" Mare makau kaw na Rubber Sun makau kaw hkam da ai hkam bawm kabye la ai, lapai lagaw grai sawng mat ai, hkum ting mung bawm hkyep hkra ai" nga nna shingyim nau na garum hpung ni tsun ai.

Hkala hkrum mat ai wa gaw asak 45 ning rai nna sai grai hkrat ai majaw rsang ra ai madang re hte ya aten Mogaung Tsi rung kaw na Myitkyina Tsi rung de sa dat sai lam chye lu ai.

2023 July shata hta mung မိုးကောင်းတောင်ဘုရား‌ခြေရင်း Myen hpyen dap makau kaw Asak 14 ning re ai Tsang 9 jawng ma hkam bawm kabye la nna Lagaw lahkawng maga daw kau ra ai lam byin lai wa sai re hpe chye lu ai.

Mogaung Ginra gaw KPDF ni shamu shamawt nga ai ginra re hte SNA hpung ni uphkang nga ai ginra re lam chye lu ai.

Shiga - Kachin Pyi Tar