Mogaung-Myitkyina Wanleng Hkrun Lam Hpaw Ai Shata Mi Jan Wa Sai Raitim Hkan Jawn Lawm Ai Hkrun Lam Hkawm Masha N Nga Shi Ai Lam

Pajau Media Channel

Myen mungdan kata myen hpyen dap asuya ahkaw ahkang zing madu ai hpang kaw nna wanleng hkrun lam ni yawng hkring mat ai lahkawng ning daram na ai hpang 2023 November praw (1) kaw nna Myen asuya hpyen dap kawn Mogaung hte Myitkyina lapran wanleng hkrun lam bai hpaw ya sai hte wanleng hkawm nga ai gaw shata mi jan wa sai re hpe chye lu ai.

Mogaung-Myitkyina Wanleng hkrun lam hpaw ai November praw (1) kaw nna shata mi tup gaw hkrun lam hkawm masha ni hpe manu jahpu n hkrat ra ai sha jawn shangun ai lam wanleng rung magam gun ni tsun ai kaw na chye lu ai.

Wanleng hkrun lam hpaw ai shata mi jan wa sai raitim ya aten du hkra hkrun lam hkawm masha hkan jawn ai lam n mu ai, kalang marang hpyen dap nta masha lahkawng masum jawn ai hta lai nna kaga n mu ai lam wanleng daru hte ni nga ai mung masha ni tsun ai hta “Gara hkrun lam hkawm masha jawn lawm ai ma n mu ai, hkrit ai majaw rai na re, raitim Wanleng gaw shani shagu hkawm taw nga, Sau shama she re” nga nna Myitkyina wanleng daru makau mayan hkan shanu nga ai mung masha ni tsun nga ma ai re.

Mogaung kaw na rawt ai wanleng gaw jahpawt (9:00) hta Myitkyina wanleng daru de du ai re hte shana daw hkying (2:00) PM daram hta gaw Mogaung de bai n htang ai ladat hte hkawm sa nga ai re hpe mung chye lu ai.

“Ndai hpang daw chyawm wanleng hkring ai hte masha marai (10) daram lawm wa ai hpe mu lu ai, lai wa sai shata hta gaw jawn lawm ai masha nan n nga ai” nga nna mung masha langai matut tsun dan ai re.

Wanleng lam hpaw hpang wa ai aten Mogaung ginra makawp maga hpung kawn tsun ai hta Jinghpaw mung ginra hta majan sawng nga ai re majaw ya na zawn wanleng lam bai hpaw wa ai gaw hpyen dap a hpyen arung arai, lu sha ni htaw shalai lu na matu rai na masa nga ai hte mung masha ni n jawn lawm na matu hte hkan jawn ai rai yang shimlam a matu pahkam n lu jaw ai nga nna November praw hta n dau shana da ai lam ni mung nga ai re hpe chye lu ai. Ya na zawn mung masha ni myit su myit rawt let jawn lawm ai lam n nga ai raitim shani shagu wanleng gaw hkawm nga ai re lam Hkungri shiga jaw la ai re.

Shiga - Hkungri